Հայաստանի տարածքային զարգացման հիմնադրամի «Ջրային ծրագրերի իրականացման մասնաճյուղի» կողմից Գեղարքունիքի մարզի Մարտունի համայնքի Ներքին Գետաշեն գյուղում կառուցվում է խմելու ջրատարի ներքին ցանց՝ շուրջ 32 կիլոմետր ընդհանուր երկարությամբ։

 

Ինչպես «Արմենպրես»-ին տեղեկացրեց Ներքին Գետաշենի վարչական ղեկավար Ռուբեն Զուլոյանը, շինարարական աշխատանքները մեկնարկել են 2022 թվականի սեպտեմբերից եւ ավարտի կհասցվեն 2023 թվականի վերջին։ Ծրագրի պայմանագրային արժեքը կազմում է 548 միլիոն 500 հազար դրամ։ 2023 թվականի ապրիլի 4-ի դրությամբ կառուցվել է շուրջ 9 կիլոմետր երկարության խմելու ջրատար, ինչի արդյունքում 2022 թվականին իրացվել է 120 միլիոն դրամ։ Շինարարական աշխատանքներն ընդհատվել են եղանակային անբարենպաստ պայմանների պատճառով եւ կվերսկսվեն առաջիկա օրերի ընթացքում։  «Ներքին Գետաշենի ջրատար ներքին ցանցի վերակառուցումը չափազանց կարեւոր խնդիր է լուծում մեր գյուղի բնակչության համար։ Բավական է ասել, որ այս ծրագրի շահառու է հանդիսանում 1000 տնտեսություն՝ մի քանի հազար շնչով։ Այս տարվա շինարարության համար  նախատեսված է ներդնել 250 միլիոն դրամ, սակայն շինարարները վստահեցնում են, որ աշխատանքները կհասցնեն ավարտել նախատեսված ժամկետից ավելի վաղ եւ ամբողջությամբ Ընդ որում, ծրագրի հաշվին ոչ միայն խմելու ջուրն անցկացվում է բնակարաններ, այլ նաեւ տեղադրվում են հաշվիչներ։ Այս կերպ լուծվում է այդ տնտեսությունների մաքուր եւ շուրջօրյա ջրամատակարարման խնդիրը, ցանցում նվազագույնի են հասցվում կորուստները։ Շինարարական աշխատանքներն ընթանում են գյուղի թաղամասերի մեծ մասում՝ մոտ 80 տոկոսի չափով»,-ներկայացրեց Ներքին Գետաշենի վարչական ղեկավարը։

 

 

 

 

Նոյյան տապան  -   Ի՞նչ է գրում մամուլը