Հայաստանում այս տարի կիրականցվի հուշարձանների մոնիթորինգ
12-01-2009 19:15:00 | Հայաստան | Մշակույթ
ԵՐԵՎԱՆ, 12 ՀՈՒՆՎԱՐԻ, ՆՈՅՅԱՆ ՏԱՊԱՆ: Հայաստանի Մշակույթի
նախարարությունը պատմամշակութային հուշարձանների պահպանության
բնագավառի խնդիրների լուծման ուղղությամբ 2008թ.-ին իրականացրել է
մի շարք միջոցառումներ: Ինչպես հունվարի 12-ի ասուլիսում հայտնեց
նախարար Հասմիկ Պողոսյանը, մշակվել են 12 հուշարձանների
վերականգման նախագծեր, սկսվել են` 5-ի, շարունակվել` 7-ի, եւ
ավարտվել 3 հուշարձանների վերականգման աշխատանքները: Ըստ նախարարի,
2008թ.-ի նոյեմբեր-դեկտեմբեր ամիսներին նախարարության մասնագետների
եւ Հայաստանյայց Առաքելական եկեղեցու ներկայացուցիչների
մասնակցությամբ անկացվել է Տավուշի մարզի հուշարձանների
մոնիթորինգ: 2009թ.-ին նման աշխատանքներ կիրականացվեն նաեւ մյուս
հանրապետության մարզերում եւ Երեւանում:
Հ.Պողոսյանը նշեց, որ անցյալ տարի կազմվել են Արագածոտնի,
Գեղարքունիքի, Վայոց Ձորի, Արմավիրի, Կոտայքի եւ Սյունիքի մարզերի
87 համայնքների տարածքներում գտնվող 498 հուշարձանների պահպանման
նախագծեր:
Նրա խոսքերով, հայկական տառարվեստի պահպանման, զարգացման եւ
տարածման ծրագրի շրջանակներում հունիսին Երեւանում անցկացվել է
«Գրանշան-2008» տառատեսակների միջազգային մրցույթ: Մշակվել է նաեւ
հայկական համակարգչային տառատեսակների ստանդարտը եւ հաստատման
ներկայացվել պետական ստանդարտների կոմիտե: Բացի այդ, մշակվել են
նաեւ հայկական 3 նոր տառատեսակների լրակազմեր: