ՎԱՇԻՆԳՏՈՆ, 8 ՀՈՒՆՎԱՐԻ, ՆՈՅՅԱՆ ՏԱՊԱՆ: ԱՄՆ Կոնգրեսի
Բյուջետային կոմիտեի կանխատեսումներով, Միացյալ Նահանգների բյուջեի
դեֆիցիտը կգերազանցի մեկ տրիլիոն դոլարը: Սեպտեմբերի 30-ին
ավարտվող ընթացիկ ֆինանսական տարվա 1.186 տրիլիոն դոլարի չափով
դեֆիցիտը ամենամեծն է երկրի ողջ պատմության համար:
Ընդ որում, այդ գումարի մեջ չի մտնում լրացուցիչ 800 մլրդ
դոլարը, որը նորընտիր նախագահ Բարակ Օբաման նախատեսում է ծախսել
երկրի տնտեսությանը օժանդակելու նպատակով: Այդ թվերը խոսում են այն
հսկայական տնտեսական դժվարությունների մասին, որոնց հետ դեռ պետք է
բախվի Օբաման հունվարի 20-ին կայանալիք պաշտոնակալումից հետո: ԱՄՆ
Կոնգրեսի բյուջետային կոմիտեի անդամների կարծիքով, ամերիկյան
տնտեսության դանդաղեցման հետեւանքով բյուջեի դեֆիցիտը նախորդ տարվա
համեմատ կաճի ավելի քան կրկնակի անգամ: Անցյալ տարի այդ ցուցանիշը
կազմել էր 455 մլրդ դոլար: