ՎԱՇԻՆԳՏՈՆ, 8 ՅՈՒՆՎԱՐԻ, ՆՈՅԵԱՆ ՏԱՊԱՆ: ԱՄՆ Կոնգրեսի
Բիւջէտային կոմիտէի կանխատեսումներով, Միացեալ Նահանգների բիւջէի
դեֆիցիտը կգերազանցի մէկ տրիլիոն դոլարը: Սեպտեմբերի 30-ին
աւարտուող ընթացիկ ֆինանսական տարուայ 1.186 տրիլիոն դոլարի չափով
դեֆիցիտը ամենամեծն է երկրի ողջ պատմութեան համար:
Ընդ որում, այդ գումարի մէջ չի մտնում լրացուցիչ 800 մլրդ
դոլարը, որը նորընտիր նախագահ Բարակ Օբաման նախատեսում է ծախսել
երկրի տնտեսութեանը օժանդակելու նպատակով: Այդ թուերը խոսում են այն
հսկայական տնտեսական դժուարութիւնների մասին, որոնց հետ դեռ պէտք է
բախուի Օբաման յունվարի 20-ին կայանալիք պաշտոնակալումից յետոյ: ԱՄՆ
Կոնգրեսի բիւջէտային կոմիտէի անդամների կարծիքով, ամերիկեան
տնտեսութեան դանդաղեցման հետեւանքով բիւջէի դեֆիցիտը նախորդ տարուայ
համեմատ կաճի աւելի քան կրկնակի անգամ: Անցեալ տարի այդ ցուցանիշը
կազմել էր 455 մլրդ դոլար: