Ադրբեջանը դե յուրե իր տարածքում է ռազմական գործողություններ իրականացնում․ Պեսկով
20-09-2023 14:10:58 | Հայաստան | Ի՞նչ է գրում մամուլը
Ազատություն. Ադրբեջանն իր դե յուրե տարածքում է ռազմական գործողություններ իրականացնում՝ Լեռնային Ղարաբաղում, ուստի Հայաստանի մեղադրանքները, թե ռուս խաղաղապահները չեն կատարել իրենց պարտավորությունները, անհիմն են, լրագրողներին ասել է Ռուսաստանի նախագահի մամուլի քարտուղար Դմիտրի Պեսկովը։
«Մենք չենք ընդունում մեր հասցեին նման նախատինքները, հատկապես Ղարաբաղը Ադրբեջանի կազմում ճանաչելու հայկական կողմի պաշտոնական որոշումից հետո։ Դե յուրե, այժմ խոսքը գնում է իր տարածքում Ադրբեջանի Հանրապետության գործողությունների մասին», - ասել է Պեսկովը։
Նա հավելել է, որ Մոսկվան կապ է պահպանում հակամարտության բոլոր կողմերի՝ Ադրբեջանի, Հայաստանի և Ղարաբաղի հայերի հետ՝ ընդգծելով, թե Հայաստանը մնում է Ռուսաստանի դաշնակիցը։
Արցախում երեկ ռազմական գործողությունների վերսկսումից հետո Հայաստանի վարչապետը հայտարարեց՝ հայկական կողմը ռուս խաղաղապահներից կոնկրետ ու շոշափելի քայլեր է ակնկալում։ «Եվ ինչպես արդեն Արտաքին գործերի նախարարության հայտարարության մեջ նշված է, մենք կարծում ենք, որ առաջինը՝ Ռուսաստանի Դաշնության խաղաղապահ ուժերը պետք է միջոցներ ձեռնարկեն», - ասել էր Փաշինյանը։
ՀԱՅԵՐԵՆ
Русский
English
Դաս. հայերեն
French
