Իրանի արտգործնախարարը հայտարարել է Գազայի հատվածից մոտալուտ «կանխարգելիչ գործողությունների» մասին
17-10-2023 13:19:43 | Հայաստան | Ի՞նչ է գրում մամուլը
Lragir.am. Իրանի արտաքին գործերի նախարար Հոսեյն Ամիր-Աբդոլլահիանը երկրի պետական հեռուստատեսությանը տված հարցազրույցում ասել է, որ առաջիկա ժամերին Գազայի «դիմադրության ուժերից» կարելի է «կանխարգելիչ գործողություններ» սպասել, գրում է BBC-ն։
Նախարարը հավելել է, որ Իսրայելին թույլ չեն տա Գազայի հատվածում որևէ գործողություն իրականացնել առանց հետևանքների։
«Դիմադրության առաջնորդները թույլ չեն տա Սիոնիստական ռեժիմին որևէ քայլ ձեռնարկել Գազայում… Բոլոր տարբերակները բաց են, և մենք չենք կարող անտարբեր մնալ Գազայի ժողովրդի դեմ իրականացված պատերազմական հանցագործությունների նկատմամբ»,- ասել է նա։
Նախկինում Իրանը հայտարարել էր, որ ոչ մի ռազմական գործողություն չի ձեռնարկի Իսրայելի դեմ, եթե նա չհարձակվի իր քաղաքացիների վրա կամ չվնասի իր շահերին։