Բաքվի դատարանում հրապարակվեց Վագիֆ Խաչատրյանի գործով մեղադրականը

17-10-2023 13:28:21 | Հայաստան | Ի՞նչ է գրում մամուլը

Ազատություն. Բաքվի զինվորական դատարանում այսօր շարունակվում է 70-ամյա արցախցի Վագիֆ Խաչատրյանի գործով դատավարությունը, դատախազը հրապարակել է մեղադրական եզրակացության եզրափակիչ մասը, հաղորդում է APA լրատվական գործակալությունը:

Խաչատրյանն իրեն մեղավոր չի ճանաչել, հերքել է մեղադրանքները:

APA-ի փոխանցմամբ՝ Վագիֆ Խաչատրյանը նիստի ժամանակ հայտարարել է փաստաբան Նաթիգ Բեյբալաևի ծառայություններից հրաժարվելու մասին, նոր պաշտպան է նշանակվել Ռադմիլա Ադիլովան: Trend-ը, մինչդեռ, հաղորդում է, թե Բեյբալաևն է հրաժարվել Խաչատրյանի հետագա պաշտպանությունից՝ վատառողջ լինելու պատճառաբանությամբ:

Վագիֆ Խաչատրյանին Ադրբեջանի ուժայինները հուլիսի վերջին առևանգեցին Հակարիի իրենց անցակետից․ նա Կարմիր Խաչի ուղեկցությամբ ու մեքենայով Երևան էր գալիս բժիշկների ցուցումով՝ սրտի հրատապ վիրահատության, Բաքուն նույն օրը հայտարարեց, թե նրան վաղուց են փնտրում որպես Մեշալի գյուղում ցեղասպանություն կատարողի։ Ըստ Ադրբեջանի իրավապահների՝ 90-ականներին Մեշալի գյուղում Խաչատրյանը «25 հոգու է սպանել», «այդտեղ ապրողներին 5.5 միլիոն մանաթի վնաս տվել»

Խաչատրյանի ընտանիքը պնդում է՝ այդ ամենը կեղծ է, հայրը ոչ մեկին չի սպանել, չի վնասել, սովորական վարորդ է եղել։

Պաշտոնական Երևանը շինծու է համարում այս դատավարությունը։

Դատավարությունը մեկնարկել է հոկտեմբերի 13-ին:

Նոյյան տապան - Ի՞նչ է գրում մամուլը