Ադրբեջանի հետ դեմ առ դեմ բանակցությունները վտանգավոր են. Արթուր Խաչատրյան
13-12-2023 13:22:08 | Հայաստան | Ի՞նչ է գրում մամուլը
Sputnik. Անդրադառնալով գերիների թեմային` ընդդիմադիր պատգամավորը նշեց, որ 7 օր է, ինչ գերիների վերադարձի մասին հայտարարությունը կա, ու մինչ օրս նրանք չեն վերադարձել։
Ադրբեջանը պարտադրում է դեմ առ դեմ բանակցություններ, որոնք ամենավտանգավորն են, քանի որ ուժեղի ու թույլի միջև բանակցություններ չեն լինում, լինում է ուղղակի պարտադրանք։ ՀՀ Ազգային ժողովի ճեպազրույցների ժամանակ նշեց «Հայաստան» խմբակցության պատգամավոր Արթուր Խաչատրյանը։
«Նիկոլ Փաշինյանը ձախողել է բոլոր բանակցությունները` սկսած 2018 թ-ից նա գնացել է զիջումների։ Արևմտյան հարթակում Փաշինյանը հանձնեց Արցախը, իսկ ռուսական հարթակներից խուսափում է։ Ես միշտ ասել եմ` կարևոր չէ, թե սեղանը որտեղ է դրված, կարևոր է, թե այդ սեղանի շուրջ ով է նստած ու ինչ է բանակցում»,– ընդգծեց նա։
Անդրադառնալով գերիների թեմային` նա նշեց, որ ապօրինի գերեվարված հայ մարդկանց Ադրբեջանը փոխանակում է երկու հանցագործի հետ, դրանից բացի քաղաքական զիջում է պահանջում ՀՀ–ից, ու մի հատ էլ դա ներկայացնում է որպես բարեգթության ժեստ։
«Ու հիմա ՀՀ–ում ինչ–որ մարդիկ այդ նույն երգն են երգում, թե տեսեք` Ադրբեջանը զիջման գնաց, ու մենք կարող ենք նրա հետ խաղաղության պայմանագիր կնքել»,– նկատեց Խաչատրյանը։
Ըստ նրա` 7 օր է, ինչ գերիների վերադարձի մասին հայտարարությունը կա, ու մինչ օրս նրանք չեն վերադարձել, դա նշանակում է, որ Ադրբեջանի հետ որևէ համաձայնության գալուց առաջ պետք է լինի այդ համաձայնության ապահովման երաշխիք։
Հիշեցնենք` դեկտեմբերի 7-ին Հայաստանի Հանրապետության վարչապետի աշխատակազմն ու Ադրբեջանի Հանրապետության նախագահի վարչակազմը համատեղ հայտարարություն տարածեցին, որում ասվում էր` Ադրբեջանի Հանրապետությունն ազատ է արձակում 32 հայ զինծառայողի, Հայաստանն էլ իր հերթին ազատ է արձակում 2 ադրբեջանցի զինծառայողի։
Նշվում էր նաև, որ բանակցությունների արդյունքում պայմանավորվածություն է ձեռք բերվել երկու պետությունների միջև վստահության կառուցման ուղղությամբ շոշափելի քայլեր ձեռնարկելու մասին:
Դեկտեմբերի 8-ին ՀՀ ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանը հայտարարեց, որ գերիների վերադարձը ժամերի կամ օրերի հարց է։ Նրա խոսքով` գերիների փոխանակությունն ամենայն հավանականությամբ տեղի կունենա հայ–ադրբեջանական սահմանին։
ՀԱՅԵՐԵՆ
Русский
English
Դաս. հայերեն
French
