ԱՄՆ-ը «խորը մտահոգություն» է հայտնում օտարերկրյա գործակալի օրինագիծը Վրաստանում կրկին շրջանառելու առիթով
05-04-2024 13:27:55 | Հայաստան | Ի՞նչ է գրում մամուլը
Ազատություն. «Մենք խորապես մտահոգված ենք, որ Վրաստանի խորհրդարանում շրջանառության մեջ դրված օրինագիծը շեղում է Վրաստանին եվրոպական ուղուց և վնաս հասցնում քաղաքացիական հասարակության կազմակերպություններին՝ բարելավելու Վրաստանի քաղաքացիների կյանքը։ Մենք Վրաստանի կառավարությանը կոչ ենք անում առաջ տանել Եվրամիությանն անդամակցելու իրենց ձգտումները», - հայտարարել է Պետդեպարտամենտի պաշտոնական ներկայացուցիչ Մեթյու Միլլերը։ Հայտարարության տեքստը տարածել է Վրաստանում ԱՄՆ-ի դեսպանատունը։
Վրաստանի իշխանությունների որոշումը քննադատել է նաև ՆԱՏՕ-ի գլխավոր քարտուղարը։ «Ես դեմ եմ Վրաստանի կառավարության ցանկացած փորձին՝ նորից կյանքի կոչելու օտարերկրյա գործակալի, կամ օտարերկրյա ազդեցության մասին օրինագիծը, քանի որ իրականում այդ գործողությունը դեմ է Վրաստանում ժողովրդավարական ինստիտուտների ամրապնդմանը», - մամուլի ասուլիսում հայտարարել է Յենս Ստոլտենբերգը։
ՄԱԿ-ի Մարդու իրավունքների կոմիտեն Վրաստանի իշխանություններին կոչ է արել հետ կանչել օրինագիծը։
Արևմտյան մի շարք երկրներ ևս քննադատել են այդ օրինագծին վերադառնալու Վրաստանի իշխանությունների քայլը։
Երեկ երեկոյան Վրաստանի խորհրդարանի մոտ բողոքի ակցիա է անցկացվել օրինագծի դեմ։ Ցուցարարները և ընդդիմությունը պնդում են, որ այն ռուսական նմանատիպ օրենքի կրկնությունն է, և պահանջում են հրաժարվել օրինագծից։
Անցած տարի, երբ առաջին անգամ վիճահարույց օրինագիծը շրջանառության մեջ էր դրվել, Վրաստանում զանգվածային բողոքի ցույցեր էին սկսվել, և իշխանությունները ստիպված հետքայլ կատարեցին՝ շրջանառությունից հանելով օրինագիծը։
ՀԱՅԵՐԵՆ
Русский
English
Դաս. հայերեն
French
