ԵՐԵՎԱՆ, 16 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Հայաստանի նկարիչների միությունում (ՀՆԿ) հոկտեմբերի 16-ին բացվեց Եկատերինա Ռոժդեստվենսկայայի «Մասնավոր հավաքածու» խորագրով անհատական ցուցահանդեսը: Ցուցադրանքում ներկայացված են համաշխարհային կերպարվեստի գլուխգործոցների համակարգչային վերամշակումները` Ռուսաստանի հայտնի քաղաքական գործիչների, հեռուստահաղորդավարների, դերասանների, լրագրողների դիմանկարները: ՀՆՄ-ի նախագահ Կարեն Աղամյանի խոսքերով, Ե.Ռոժդեստվենսկայան փորձել է ցույց տալ, թե ժամանակակից տեխնոլոգիաների միջոցով ինչպես կարելի է, մասնավորապես, վերափոխել եւ արդիականացնել վերածննդի դարաշրջանի նկարիչների գործերը: Ե.Ռոժդեստվենսկայան ավարտել է Մոսկվայի միջազգային հարաբերությունների պետական ինստիտուտը: Նա բազմաթիվ թարգմանությունների հեղինակ է: Այնուհետեւ նա տարվել է լուսանկարչությամբ եւ 1999թ.-ից սկսած իր աշխատանքները հրապարակել «Պատմության քարավան» ամսագրում: Նրա աշխատանքները ներկայացվել են աշխարհի տարբեր երկրներում: Ցուցահանդեսի բացմանը ներկա էին ՀՀ առաջին տիկին Ռիտա Սարգսյանը եւ ՀՀ մշակույթի նախարար Հասմիկ Պողոսյանը:

---