2008-2009 ԹԹ. ՄՀԶ-Ի ՀԱՄԱՁԱՅՆ, ՀԱՅԱՍՏԱՆԸ ԻՐ ՄՐՑՈՒՆԱԿՈՒԹՅԱՄԲ
ԶԲԱՂԵՑՆՈՒՄ Է 97-ՐԴ ՏԵՂԸ` ՆԱԽՈՐԴ ՏԱՐՎԱ 93-ՐԴԻ ՓՈԽԱՐԵՆ
09-10-2008 17:00:00 | Հայաստան | Տնտեսություն
ԵՐԵՎԱՆ, 9 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: 2008-2009թթ.
Մրցունակության համաշխարհային զեկույցի (ՄՀԶ) համաձայն, Հայաստանն
իր մրցունակությամբ զբաղեցնում է 97-րդ տեղը 134 երկրների շարքում`
նախորդ տարվա 93-րդի փոխարեն: Ինչպես զեկույցի տվյալների
հրապարակմանը նվիրված հոկտեմբերի 9-ի ասուլիսում հայտնեց Երեւանի
«Տնտեսություն եւ արժեքներ» հետազոտական կենտրոնի նախագահ Մանուկ
Հերգնյանը, Հայաստանը արդեն 4-րդ տարին է, ինչ ընդգրկվում է
ՄՀԶ-ում: Ըստ նրա, ՄՀԶ-ն աշխարհում լայնորեն ճանաչված եւ մեծ
հեղինակություն վայելող ամենամյա հանդես է, որտեղ համեմատվում,
գնահատվում եւ վերլուծվում են աշխարհի տարբեր երկրների տնտեսական
մրցակցությունը եւ դրանց տնտեսական զարգացման վրա ներազդող
գործոնները:
Մ.Հերգյանը նշեց, որ ՄԶՀ-ում երկրները դասակարգվում են ըստ
Համաշխարհային մրցունակության (ՀԱՄ) ցուցիչի: Այն երկրների
մրցունակությունը գնահատող համապարփակ ցուցանիշ է եւ հիմնվում է
ավելի քան 110 գործոնների գնահատականների վրա, որոնք իրենց հերթին
խմբավորվում են ըստ մրցունակության 12 հենասյուների: Դրանցով
ամփոփվում է լայն ընդգրկում ունեցող այնպիսի գործոնների
վերլուծությունը, ինչպիսիք են երկրների մակրոտնտեսական
կատարողականը, առողջապահությունը, կրթությունը եւ այլն:
Համաձայն ՄՀԶ-ի ՀԱՄ ցուցիչի դասակարգման, աշխարհի
ամենամրցունակ առաջին երեք երկրներն են ԱՄՆ-ը, Շվեյցարիան եւ
Դանիան: ԱՊՀ երկրների շարքում առաջին երեք տեղերը զբաղեցնում են
Ռուսաստանը, Ղազախստանը եւ Ադրբեջանը: Մ.Հերգյանը նշեց, որ ցուցիչը
չի ներառել վերջին միջազգային ֆինանսական ճգնաժամի
ազդեցությունները, քանի որ զեկույցում օգտագործված տվյալները
ներկայացնում են 2007թ.-ի տարեկան ցուցանիշները:
Ըստ նրա, Հայաստանի մրցակցային դիրքը նախորդ տարվա համեմատ
նկատելի փոփոխությունների չի ենթարկվել եւ շարունակում է մնալ
բավականին ցածր մակարդակում: Մ.Հերգյանի խոսքերով, Հայաստանն այսօր
կանգնած է երկրի մրցունակության բարձրացման լուրջ մարտահրավերների
առջեւ, որոնց հաղթահարումը թույլ կտա պահպանել տնտեսական աճի բարձր
տեմպերը: Ըստ նրա, զարգացման ներկայիս փուլում Հայաստանի հիմնական
մարտահրավերները կապված են մրցունակության միկրոտնտեսական հիմքերի
զարգացման հետ, սակայն վերջին տարում ավելացել են նաեւ
մակրոտնտեսական ռիսկերը: Նշվեց նաեւ, որ ՀՀ կառավարության
առաջնային խնդիրներից են ռեսուրսների եւ ապրանքների շուկաներում
առկա թերությունների վերացումը, կայուն մակրոտնտեսական միջավայրի
եւ գործարարության զարգացմանն ուղղված ինստիտուցիոնալ դաշտի
ապահովումը: