2008-2009 ԹԹ. ՄՀԶ-Ի ՀԱՄԱՁԱՅՆ, ՀԱՅԱՍՏԱՆԸ ԻՐ ՄՐՑՈՒՆԱԿՈՒԹԵԱՄԲ
ԶԲԱՂԵՑՆՈՒՄ Է 97-ՐԴ ՏԵՂԸ` ՆԱԽՈՐԴ ՏԱՐՈՒԱՅ 93-ՐԴԻ ՓՈԽԱՐԷՆ
09-10-2008 17:00:00 | Հայաստան | Տնտեսութիւն
ԵՐԵՎԱՆ, 9 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: 2008-2009թթ.
Մրցունակութեան համաշխարհային զեկոյցի (ՄՀԶ) համաձայն, Հայաստանն
իր մրցունակութեամբ զբաղեցնում է 97-րդ տեղը 134 երկրների շարքում`
նախորդ տարուայ 93-րդի փոխարէն: Ինչպէս զեկոյցի տուեալների
հրապարակմանը նուիրուած հոկտեմբերի 9-ի ասուլիսում յայտնեց Երեւանի
«Տնտեսութիւն եւ արժէքներ» հետազոտական կենտրոնի նախագահ Մանուկ
Հերգնյանը, Հայաստանը արդէն 4-րդ տարին է, ինչ ընդգրկվում է
ՄՀԶ-ում: Ըստ նրա, ՄՀԶ-ն աշխարհում լայնօրէն ճանաչուած եւ մեծ
հեղինակութիւն վայելող ամենամեայ հանդէս է, որտեղ յամեմատւում,
գնահատւում եւ վերլուծւում են աշխարհի տարբեր երկրների տնտեսական
մրցակցութիւնը եւ դրանց տնտեսական զարգացման վրայ ներազդող
գործօնները:
Մ.Հերգյանը նշեց, որ ՄԶՀ-ում երկրները դասակարգւում են ըստ
Համաշխարհային մրցունակութեան (ՀԱՄ) ցուցիչի: Այն երկրների
մրցունակությունը գնահատող համապարփակ ցուցանիշ է եւ հիմնւում է
աւելի քան 110 գործօնների գնահատականների վրայ, որոնք իրենց հերթին
խմբավորվում են ըստ մրցունակութեան 12 հենասյուների: Դրանցով
ամփոփւում է լայն ընդգրկում ունեցող այնպիսի գործօնների
վերլուծութիւնը, ինչպիսիք են երկրների մակրոտնտեսական
կատարողականը, առողջապահութիւնը, կրթութիւնը եւ այլն:
Համաձայն ՄՀԶ-ի ՀԱՄ ցուցիչի դասակարգման, աշխարհի
ամենամրցունակ առաջին երեք երկրներն են ԱՄՆ-ը, Շվեյցարիան եւ
Դանիան: ԱՊՀ երկրների շարքում առաջին երեք տեղերը զբաղեցնում են
Ռուսաստանը, Ղազախստանը եւ Ադրբեջանը: Մ.Հերգյանը նշեց, որ ցուցիչը
չի ներառել վերջին միջազգային ֆինանսական ճգնաժամի
ազդեցութիւնները, քանի որ զեկոյցում օգտագործված տուեալները
ներկայացնում են 2007թ.-ի տարեկան ցուցանիշները:
Ըստ նրա, Հայաստանի մրցակցային դիրքը նախորդ տարուայ համեմատ
նկատելի փոփոխութիւնների չի ենթարկուել եւ շարունակում է մնալ
բաւականին ցածր մակարդակում: Մ.Հերգյանի խօսքերով, Հայաստանն այսօր
կանգնած է երկրի մրցունակութեան բարձրացման լուրջ մարտահրավերների
առջեւ, որոնց յաղթահարումը թոյլ կտայ պահպանել տնտեսական աճի բարձր
տեմպերը: Ըստ նրա, զարգացման ներկայիս փուլում Հայաստանի հիմնական
մարտահրավերները կապուած են մրցունակութեան միկրոտնտեսական հիմքերի
զարգացման հետ, սակայն վերջին տարում աւելացել են նաեւ
մակրոտնտեսական ռիսկերը: Նշուեց նաեւ, որ ՀՀ կառավարութեան
առաջնային խնդիրներից են ռեսուրսների եւ ապրանքների շուկաներում
առկայ թերութիւնների վերացումը, կայուն մակրոտնտեսական միջավայրի
եւ գործարարութեան զարգացմանն ուղղուած ինստիտուցիոնալ դաշտի
ապահովումը: