ՀՀ ԿԱՌԱՎԱՐՈՒԹՅՈՒՆԸ ՀԱՎԱՆՈՒԹՅՈՒՆ Է ՏՎԵԼ 2009 Թ.-Ի ՊԵՏԲՅՈՒՋԵԻ
ՄԱՍԻՆ ՕՐԵՆՔԻ ՆԱԽԱԳԾԻՆ
25-09-2008 21:00:00 | Հայաստան | Տնտեսություն
ԵՐԵՎԱՆ, 25 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: ՀՀ կառավարությունը
սեպտեմբերի 25-ի նիստում հավանություն է տվել «ՀՀ 2009թ. պետական
բյուջեի մասին» ՀՀ օրենքի նախագծին, որը սահմանված կարգով
կներկայացվի ՀՀ ԱԺ: Այս մասին «ՆՈՅՅԱՆ ՏԱՊԱՆ»-ին հայտնեցին ՀՀ
կառավարության Տեղեկատվության եւ հասարակայնության հետ կապերի
վարչությունից:
Փաստաթղթի համաձայն, ՀՀ 2009թ. համախմբված բյուջեն կկազմի
եկամուտների գծով` 927,1 մլրդ դրամ (առանց միջբյուջետային
փոխանցումներից ստացվող մուտքերի), ծախսերի գծով` 967,1 մլրդ դրամ
(առանց միջբյուջետային փոխանցումների), դեֆիցիտը (պակասուրդը)` 40
մլրդ դրամ:
ՀՀ համայնքների 2009թ. բյուջեները եկամուտների եւ ծախսերի
գծով կկազմեն 50,1 մլրդ դրամ (եկամուտների գծով` ներառյալ պետական
բյուջեից ստացվող պաշտոնական դրամաշնորհները):
Նախագծով առաջարկվել է ՀՀ 2009թ. պետական բյուջեն հաստատել
եկամուտների գծով` 905,4 մլրդ դրամ, ծախսերի գծով` 945,4 մլրդ
դրամ, դեֆիցիտը (պակասուրդը)` 40 մլրդ դրամ:
Վարչապետ Տիգրան Սարգսյանը հանձնարարել է բոլոր
նախարարություններին եւ գերատեսչություններին` նախագծի վերաբերյալ
խմբագրական դիտողություններ ունենալու դեպքում, 2-օրյա ժամկետում
դրանք տրամադրել ՀՀ Ֆինանսների նախարարությանը, որպեսզի
փաստաթուղթը վերջնական տեսքով, սահմանված ժամկետում, ներկայացվի ՀՀ
ԱԺ: