ՀՈՒՆԱՍՏԱՆԻ ԿԱՌԱՎԱՐՈՒԹՅԱՆ ՆԱԽԱՁԵՌՆՈՒԹՅԱՄԲ ՀԱՅԱՍՏԱՆՈՒՄ
ԻՐԱԿԱՆԱՑՎՈՒՄ ԵՆ ՄԻ ՇԱՐՔ ԾՐԱԳՐԵՐ
15-09-2008 19:00:00 | Հայաստան | Տնտեսություն
ԵՐԵՎԱՆ, 15 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Հունաստանի
կառավարության օժանադակությամբ Նոյեմբերյան քաղաքի Արճիս
համայնքում տեղադրվել է 200 տոննա տարողությամբ սառնարան, ինչը
շրջանի բնակիչներին հնարավորություն կտա պահպանել իրենց միրգն ու
բանջարեղենը, ինչպես նաեւ մսամթերքը: Ինչպես «ՆՈՅՅԱՆ ՏԱՊԱՆ»-ի
թղթակցին հայտնեց ՀՅԴ Հունաստանի Հայ Դատի գրասենյակի նախագահ
Գասպար Կարապետյանը, բացի այդ, Հունաստանի կառավարության
օժանդակությամբ Երեւանում ներկայումս կառուցվում է մթերքի
ապահովության լաբորատորիա:
Լաբորատորիայում նախատեսվում է Հայաստանից արտահանվող մթերքը
ենթարկել փորձաքննության եւ տալ եվրոպական ստանդարտներին
համապատասխանող սերտիֆիկատ: Գ.Կարապետյանի խոսքերով, այս երկու
ծրագրերի իրականացման համար Հունաստանի կառավարությունը հատկացրել
է 530 հազար եվրո:
Ըստ Գ.Կարապետյանի, Հունաստանի պետությունը Հայաստանը
համարում է իր բարեկամը եւ ամեն կերպ փորձում է աջակցել հայ
ժողովրդին, ինչպես նաեւ Հունաստանի հայկական գաղթօջախին: Նրա
խոսքերով, Հունաստանի կառավարության կողմից բոլոր ծրագրերը
Հայաստանում իրականացվում են արդյունավետ, այդ իսկ պատճառով, ըստ
Գ.Կարապետյանի, այս ծրագրերը շարունակական բնույթ են կրելու: «Եթե
նախկին խորհրդային երկրներում վախենում են որեւէ գործ իրականացնել,
ապա այսօր այդ վտանգը չկա Հայաստանում: Այս ծրագրերը Հայաստանի
տնտեսության զարգացման համար կարեւոր նշանակություն ունեն»,- նշեց
նա:
Գ.Կարապետյանը հայտնեց, որ արդեն մշակվել է 2 նոր ծրագիր եւս:
Մասնավորապես, նախատեսվում է Երեւանում կառուցել հեղուկների` ջուր,
կոնյակ, գինի եւ այլն, հետազոտման լաբորատորիա, որտեղ
փորձաքննություն անցնելուց հետո դրանց կտրվի համապատասխան
սերտիֆիկատ: Բացի դրանից Հայաստանում կկառուցվի կենդանիների կերի
պատրաստման գործարան: Առայժմ ճշտվում է գործարանի կառուցման վայրը:
Գ.Կարապետյանի խոսքերով, լաբորատորիայի եւ գործարանի բացումը
նախատեսվում է 2009թ.-ին: Այս երկու ծրագրերի համար Հունաստանի
կառավարությունը հատկացրել է 500 հազար եվրո:
Նշենք նաեւ, որ Հունաստանի Հայ Դատի հանձնախմբի
նախաձեռնությամբ Նոյեմբերյան, Սիսիան, Իջեւան եւ Ալավերդի
քաղաքները եւ Հունաստանի 4 քաղաքներ դարձել են քույր քաղաքներ: