ԱԶՈՏԱԿԱՆ ՊԱՐԱՐՏԱՆՅՈՒԹԻ ՇՈՒԿԱՅՈՒՄ ԳԵՐԻՇԽՈՂ ԴԻՐՔ ՈՒՆԵՑՈՂ
«ԴՎԻՆ ՀՈԼԴԻՆԳԸ» ՏՈՒԳԱՆՎԵՑ 1 ՄԼՆ ԴՈԼԱՐՈՎ
03-09-2008 18:00:00 | Հայաստան | Տնտեսություն
ԵՐԵՎԱՆ, 3 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: ՀՀ Տնտեսական
մրցակցության պաշտպանության պետական հանձնաժողովի սեպտեմբերի 3-ի
նիստում որոշվեց «Դվին Հոլդինգ» ընկերությանը տուգանել 2007թ.-ի
հասույթի 2%-ի չափով, բայց ոչ ավելի, քան 300 մլն դրամով (մոտ 1
մլն ԱՄՆ դոլար):
Ինչպես նիստում հայտնեց հանձնաժողովի նախագահ Աշոտ
Շահնազարյանը, ընկերության նկատմամբ հարուցվել էր վարույթ, որի
ընթացքում պարզվել է, որ ազոտական պարարտանյութերի շուկայում
գերիշխող դիրք ունեցող «Դվին Հոլդինգ»-ը նպատակաուղղված
գործողություններով կիրառել է չհիմնավորված գին`
հողօգտագործողներից բացի այլ անձանց իրացվող ազոտական
պարարտանյութի իրացման գինը 2008թ.-ի մարտին սահմանելով 111430
դրամ, մինչդեռ դրա իրական գինը 84 հազար դրամ է:
Վարույթի ընթացքում ընկերությունը հայտնել է, որ ՀՀ
կառավարության որոշման համաձայն Գյուղնախարարության հետ կնքել է
պայմանագիր, ըստ որի պարտավորվել է նախարարության կողմից տրված
գյուղերի ցանկին համապատասխան գյուղատնտեսական արտադրանք
արտադրողներին մատակարարել 20 հազար տոննա ամոնիումային սելիտրա` 1
տոննան 84 հազար դրամով (74 հազ. դրամը վճարում են գյուղական
արտադրանք արտադրողները, իսկ 10 հազարը` որպես սուբսիդիա, ՀՀ
Գյուղնախարարությունը): «Դվին Հոլդինգ»-ի գրության համաձայն,
սելիտրա արտադրող գործընկեր վրացական կազմակերպության կողմից
զգուշացվել է, որ 2008թ.-ի հունվարի 1-ից արտահանման գինը կտրուկ
աճելու է, եւ այդ պատճառով ընկերությունը Գյուղնախարարության հետ
կնքված պայմանագրով մատակարարումը կատարել է մինչեւ 2007թ.-ի
դեկտեմբերի 30-ը:
Նշենք, որ ընկերությունը 2007թ.-ի նոյեմբերից մինչեւ 2008թ.-ի
հունիսի 20-ը ներմուծել է 23985 տոննա ամոնիումային սելիտրա, որից
20 հազ. տոննան իրացվել է ՀՀ Գյուղնախարարության հետ կնքված
պայմանագրով, իսկ Գյուղնախարարության ցուցակից դուրս իրացրել է
նաեւ 1700 տոննա Արցախում, որից 1000-ի 1 տոննան` 84 հազ. դրամով,
իսկ 700 տոննայի 1 տոննան` 110 հազ. դրամով: Մինչդեռ, ըստ «Դվին
Հոլդինգ»-ի ներկայացրած նյութերի, հողօգտագործողներին եւ այլ
անձանց համար 1 տոննա ազոտական պարարտանյութի իրացման գնի
կառուցվածքում ձեռքբերման գինը մարտին նույնն է մնացել:
Արդյունքում, պարարտանյութի իրացման գինը մարտին կազմել է 111430
դրամ, փետրվարի նկատմամբ աճելով 11430 դրամով, իսկ հունվարի
նկատմամբ` 6430 դրամով, ինչով 1 տոննայից ապահովվել է 32318 դրամի
լրացուցիչ շահույթ: