«ՈՍԿԵ ԾԻՐԱՆ»-Ը ՊԵՏՔ Է ԴԱՌՆԱ ԱՅՆ ՄՇԱԿՈՒԹԱՅԻՆ ՀԱՐԹԱԿԸ, ՈՐՏԵՂ
ՊԱՐԲԵՐԱԲԱՐ ՊԻՏԻ ԾՆՎԵՆ ՍՏԵՂԾԱԳՈՐԾԱԿԱՆ ՄՏԱՀՂԱՑՈՒՄՆԵՐ ՈՒ ՈՐԱԿՅԱԼ
ԿԻՆՈԱՐՏԱԴՐԱՆՔ,- ԿԱՐԾՈՒՄ ԵՆ ԿԻՆՈԳՈՐԾԻՉՆԵՐԸ
«ՈՍԿԵ ԾԻՐԱՆ»-Ը ՊԵՏՔ Է ԴԱՌՆԱ ԱՅՆ ՄՇԱԿՈՒԹԱՅԻՆ ՀԱՐԹԱԿԸ, ՈՐՏԵՂ
ՊԱՐԲԵՐԱԲԱՐ ՊԻՏԻ ԾՆՎԵՆ ՍՏԵՂԾԱԳՈՐԾԱԿԱՆ ՄՏԱՀՂԱՑՈՒՄՆԵՐ ՈՒ ՈՐԱԿՅԱԼ
ԿԻՆՈԱՐՏԱԴՐԱՆՔ,- ԿԱՐԾՈՒՄ ԵՆ ԿԻՆՈԳՈՐԾԻՉՆԵՐԸ
21-07-2008 18:35:00 | Հայաստան | Մշակույթ
ԵՐԵՎԱՆ, 21 ՀՈՒԼԻՍԻ, ՆՈՅՅԱՆ ՏԱՊԱՆ: «Ոսկե ծիրան» միջազգային
5-րդ կինոփառատոնի կազմակերպիչները համոզված են, որ նորաստեղծ
«Համահայկական նախագիծ» ծրագրի հաջող իրականացումը կստեղծի
հայկական եւ համահայկական կինեմատոգրաֆիական միջավայր: Ավելին,
հենց այս նախաձեռնությամբ Հայաստանը կտեղավորվի համաշխարհային
կինոդաշտում: Ծրագրին մասնակցող Հայաստանի եւ արտերկրի հայազգի
անվանի կինոգործիչների ցանկությունն է կինոփառատոնը դարձնել
մշակութային այն հարթակը, որտեղ պարբերաբար պիտի ծնվեն
ստեղծագործական մտահղացումներ եւ որակյալ կինոարտադրանք:
Հուլիսի 19-ին հայ կինոռեժիսորների հանդիպման ժամանակ կինոգետ
Դավիթ Մուրադյանը նշեց, որ «Համահայկական կինոնախագիծ» ֆորումը
հայկական կինոյի վերելքն ապահովելու ամենահետաքրքիր եւ խելացի
ճանապարհներից մեկն է: Ըստ նրա, «աշխարհի տարբեր անկյուններում
ապրող ու ստեղծագործող հայ ռեժիսորներից յուրաքանչյուրը հայկական
ինքնությունից բացի իր մեջ կրում է այն մշակույթի փորձը, որի մեջ
ինքը ապրել ու ստեղծագործել է»:
Իսկ ճանաչված կանադահայ կինոռեժիսոր Ատոմ Էգոյանը նախագիծը
իրականանալի համարեց. «Այս նախագծի գեղեցկությունը նրանում է, որ
մեկ ֆիլմում կարելի է մի քանի անհատական ձեռագիր տեսնել: Մեզ համար
այս նախագիծը մարտահրավեր է: Պետք է մտածել, թե ինչով կարող ենք
շահագրգռել համաշխարհային հանդիսատեսին: Խնդիրն այն է, թե անհատ
ռեժիսորներն ինչպես կկարողանան հոգալ իրենց անհատական ծախսերը»:
Անվանի ռուսաստանցի կինոռեժիսոր Ռոման Բալայանը նախագծի
հիմնական խնդիրը տեսնում է սցենարի մեջ. «Ամենադժվար շրջանը կլինի
այն ժամանակ, երբ պատրաստ կլինի սցենարը` համաձայնություններ,
առարկումներ»: Ռոման Բալայանը համաձայն չէր նախապես որոշված երկու`
խաղարկային եւ վավերգարական ֆիլմերի անվանումների հետ. «Ինձ դուր
չեկավ «հող», «տուն», այսպես ասած, հայկական ծանր թեմաները: Քիչ
առաջ հյուրանոցի մոտ մի աղքատ մարդ ինչ-որ բան էր վաճառում:
Մոտեցա, զրուցեցի, հիանալի անձնավորություն էր, ընտիր տղա: Կարելի
է եւ իր մասին նկարահանել ֆիլմը: Ինչ է, աշխարհում միայն հայե՞րը
տուն ու հող ունեն»:
Հանդիպման ավարտին Ռոման Բալայանը դիմեց նրանց, ովքեր
աշխատելու են ֆիլմերի` ասելով. «Աշխարհին այնքան էլ հետաքրքիր չի,
թե ինչպես ենք լաց լինում, որքան հետաքրքիր է, թե ինչպես ենք
ծիծաղում»: