ԵՐԵՎԱՆ, 8 ՀՈՒԼԻՍԻ, ՆՈՅՅԱՆ ՏԱՊԱՆ: Հուլիսի 10-12-ին
Ծաղկաձորում կանցկացվի ՀՀ նախագահի սահմանած «Լավագույն մարզական
ընտանիք» հանրապետական մրցույթի եզրափակիչ փուլը: ՀՀ սպորտի եւ
երիտասարդության հարցերի փոխնախարար Խաչիկ Ասրյանը «ՆՏ» թղթակցին
հայտնեց, որ միջոցառումն ավանդական է դարձել. այն անցկացվում է
5-րդ տարին, եւ տարեցտարի ավելանում է մասնակիցների թիվը: Այս
անգամ համայնքներում անցկացված նախնական փուլին ընդհանուր հաշվով
մասնակցել են 124 ընտանիքներ: Ծաղկաձորում կայանալիք եզրափակիչին
կմասնակցեն երկրի բոլոր մարզերի եւ ԼՂՀ-ի 36 ընտանիքներ: Մրցույթի
ծրագրում ընդգրկված են 6 մրցաձեւեր` փոխանցավազք, տեղից հեռացատկ,
թենիսի գնդակի նետում, պարանացատկ, պարանի ձգում եւ խաղային
փոխանցավազք: Ընդհանուր մրցանակային հիմնադրամը կազմում է 12 մլն
120 հազար դրամ: