Արբիլում կայանալիք մրցաշարում Իրանը կներկայացնի «Արարատ»
կանանց բասկետբոլի թիմը
09-02-2010 19:58:00 | Իրան | Սպորտ
ԹԵՀՐԱՆ, 9 ՓԵՏՐՎԱՐԻ, ՆՈՅՅԱՆ ՏԱՊԱՆ-ՀԱՅԵՐՆ ԱՅՍՕՐ: Իրաքի Արբիլ
քաղաքում կայանալիք արեւելյան Ասիայի գավաթի խաղերում Իրանի
ներկայացուցիչը ՀՄ «Արարատ» կանանց բասկետբոլի թիմն է, տեղեկացնում
է «Ալիքը»: Այդ առիթով, փետրվարի 6-ին, «Արարատ» մարզավանում տեղի
է ունեցել մամլո ասուլիս` «Հայ կանանց մարզանքի ընդլայնումը ներկա
չափանիշներով» թեմայով:
Մամլո ասուլիսին ներկա են եղել ՀՄԱԿ-ի Կենտրոնական վարչության
փոխնախագահ Հարմիկ Զովելյանը, Իրանի բասկետբոլի ֆեդերացիայի
քարտուղար Համիդ Խոմջանին, Իրանի կանանց ֆեդերացիայի փոխնախագահ
Ֆաթեմե Քարամզադեն, կանանց բասկետբոլի ֆեդերացիայի քարտուղար եւ
ՀՄԱԿ-ի կանանց բասկետբոլի թիմի պատասխանատու Օդետ Աղաջանյանը,
Իրանի մինի բասկետբոլի ազգային հավաքականի պատասխանատու եւ
պատանեկան թիմի նախագահ Ժոզեֆ Նազարյանը եւ մարզական միության
վարչության նախագահ Արբի Սարգսյանը:
Ասուլիսի ընթացքում խոսվել է «Արարատի» աղջիկների եւ տղաների
բասկետբոլի թիմերի կարգավիճակի, հուլիսի 5-ին Իրաքի Արբիլ քաղաքում
կայանալիք խաղերի նախապատրաստական աշխատանքների մասին: