Արքայազն Հարին կնոջ և երեխաների հետ ժամանել է Մեծ Բրիտանիա
26-08-2026 18:50 Մեծ Բրիտանիա Ի՞նչ է գրում մամուլը
azatutyun.am Արքայազն Հարին, իր կինը՝ Մեգանը եւ իրենց երկու երեխաները այսօր ժամանել են Մեծ Բրիտանիա։
Զույգը վեց տարի առաջ թագավորական ընտանիքի հետ ունեցած լարված հարաբերությունների ֆոնին՝ Մեծ Բրիտանիայից տեղափոխվել էր Կալիֆոռնիա։ The Telegraph-ը եւ այլ լրատվամիջոցներ հաղորդում են, որ այժմ նրանք մասնավոր ինքնաթիռով ժամանել են կենտրոնական Անգլիայի Բիրմինգհեմ քաղաքի օդանավակայան։
Նրանց երեխաները՝ յոթամյա Արչին եւ հնգամյա Լիլիբեթն արդեն ընդունվել են տեղի մասնավոր դպրոցներից մեկը եւ սեպտեմբերին կսկսեն ուսումը։
41-ամյա Հարին եւ 45-ամյա Մեգանը, որոնք կրում են Սասեքսի դուքսի եւ դքսուհու տիտղոսները, 2020 թվականին հրաժարվել էին թագավորական ընտանիքի ավագ անդամների պարտականություններից եւ տեղափոխվել ԱՄՆ։
2020 թվականին, երբ զույգը հրաժարվեց թագավորական պարտականություններից, Հարիի տատիկը՝ հանգուցյալ թագուհի Եղիսաբեթ երկրորդը, նրանց զրկեց «Թագավորական մեծություն» տիտղոսից, ինչպես նաեւ պետական ֆինանսավորման եւ ոստիկանության պաշտպանության։
Թագավորական ընտանիքի հետ նրանց հարաբերությունները հետագայում ավելի են սրվել։ Դրան նպաստել են նաեւ Հարիի «Spare» հուշագրությունը եւ Մեգանի Օփրա Ուինֆրիին տված աղմկահարույց հարցազրույցը։
Հարին եւ Մեգանը երկար ընդմիջումից հետո վերջերս հանդիպել են թագավոր Չարլզ երրորդի հետ։ Սակայն զույգը չէր հանդիպել Ուիլյամին եւ Քեթրինին։ Ուստի նրանց վերադարձի ֆոնին գլխավոր հարցերից մեկը այն է, թե արդյոք երկու եղբայրները կկարողանան հաշտվել։ Բաց է մնում նաեւ այն հարցը, թե արդյոք Հարին եւ իր ընտանիքը Մեծ Բրիտանիայում կստանան պետական ֆինանսավորմամբ անվտանգություն։
* Այս բնագիրը ինքնաշխատորեն թարգմանված է արհեստական բանականության (ԱԲ) կողմից:
* Այս տեքստը ավտոմատ թարգմանվել է արհեստական բանականության (ԱԲ) կողմից:
ՀԱՅԵՐԵՆ
