«ԲՈՍՏՈՆ ԳԼՈԲ». ԱՄՆ-ՌՈՒՍԱՍՏԱՆ ՀԱՐԱԲԵՐՈՒԹՅՈՒՆՆԵՐԻ ՀԱՄԱՐ
ՆԱԽԸՆՏՐԵԼԻ Է ՕԲԱՄԱՅԻ ՀԱՂԹԱՆԱԿԸ
28-10-2008 18:19:00 | ԱՄՆ | Միջազգային
ՎԱՇԻՆԳՏՈՆ, 28 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: ԱՄՆ-Ռուսաստան
հարաբերությունների ապագայի համար նոյեմբերի 4-ի նախագահական
ընտրություններում ավելի նախընտրելի կլիներ դեմոկրատ Բարաք Օբամայի
հաղթանակը, քան հանրապետական Ջոն Մակքեյնի: Ինչպես հաղորդում է
ԻՏԱՌ-ՏԱՍՍ-ը, այս մասին գրում է «Բոստոն գլոբ» թերթի մեկնաբան
Ջեյմս Քերրոլը:
Վերլուծելով Ռուսաստանի հետ հարաբերությունների հանդեպ
նախագահի թեկնածուների մոտեցումները` հեղինակը նշում է
հանրապետական սենատորի «հակամոսկովյան ռազմատենչությունը», որը
մշտապես պայքարում է ՆԱՏՕ-ի արագ ընդլայնման եւ «մեծ ութնյակից»
ՌԴ-ի հեռացման համար:
Ինչ վերաբերում է Օբամային, որը Մակքեյնի նման կտրուկ
քննադատեց Մոսկվայի գործողությունները Վրաստանում, ապա նրա
հայտարարությունները, մեկնաբանի կարծիքով, աչքի են ընկնում «մեծ
հավասարակշռվածությամբ»: «Նա դրականորեն է արտահայտվում ՆԱՏՕ
ընդունվելու Ուկրաինայի եւ Վրաստանի ձգտման մասին` վերապահում
անելով միաժամանակ, որ նրանց անդամակցությունը կախված կլինի
նրանից, թե որքանով են այդ երկրները համապատասխանում ՆԱՏՕ-ի
«անդամության չափորոշիչներին», ինչին նրանցից ոչ մեկը տեսանելի
ապագայում չի կարողանա հասնել»,- գրում է Ջ.Քերրոլը: «Մակքեյնը
տարված է նոր «սառը պատերազմով», Օբաման ջերմացման հույս ունի»,-
նկատում է մեկնաբանը: