ՎԱՇԻՆԳՏՈՆ, 28 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: ԱՄՆ-ի հանրապետական սենատոր Թեդ Սթիվենսը մեղավոր է ճանաչվել կաշառակերության մեջ: 84-ամյա Սթիվենսը, որը Ալյասկայի նահանգից 40 տարի շարունակ սենատորի պաշտոն է զբաղեցնում, մեղադրվել է Veco նավթային ընկերությունից նվերներ ստանալու եւ ընկերության հաշվին իր տունը վերանորոգելու փաստը թաքցնելու մեջ: Ընկերությունից Թեդ Սթիվենսի ստացած նվերների ընդհանուր արժեքը գնահատվում է 250 հազար դոլար: Սակայն, ինչպես հաղորդում է BBC-ն, սենատորը պնդում է, որ ինքն անմեղ է: Թեդ Սթիվենսին սպառնում է բանտարկություն մինչեւ հինգ տարի ժամկետով: Այժմ նա Ալյասկայի նահանգից ԱՄՆ-ի Սենատում վերընտրվելու համար պայքար է մղում դեմոկրատ Մարկ Բեգիչի դեմ:

---