ՍՊԱՆՎԵԼ Է ՔԻՄԻԱԿԱՆ ԶԵՆՔԻ ԳԾՈՎ «ԱԼ ՂԱԻԴԱՅԻ» ԳԼԽԱՎՈՐ
ՓՈՐՁԱԳԵՏԸ
29-07-2008 15:05:00 | | Միջազգային
ԻՍԼԱՄԱԲԱԴ, 29 ՀՈՒԼԻՍԻ, ՆՈՅՅԱՆ ՏԱՊԱՆ: Ավիահարվածի հետեւանքով
Պակիստանում ոչնչացվել է քիմիական զենքի գծով «Ալ-Քաիդայի»
փորձագետ Միդհատ Մուրսի Սայիդ Ումարը, որ հայտնի է նաեւ Աբու Խաբաբ
Մասրի անունով: Նրա մահվան մասին հայտնել են «Թալիբան» շարժման
Հարավային Վազիրիստանի ներկայացուցիչները:
Ինչպես հաղորդում է BBC-ն, հրթիռները հարվածել են Ազամ Վարսակ
շրջանի գյուղական մզկիթի կողքին գտնվող տանը: Ըստ ականատեսների,
ոչնչացված տունը պատկանել է տեղի մի բնակչի, եւ այնտեղ հաճախ են
իջեւանել գրոհայինները: Բացի քիմիկոս-փորձագետից, ավիահարվածի
հետեւանքով զոհվել է առնվազն հինգ մարդ:
Ամենայն հավանականությամբ, վերջին ժամանակները Սայիդ Ումարը
զբաղվում էր գրոհայինների պատրաստմամբ Աֆղանստանի տարածքում գտնվող
վարժական ճամբարներում: Նրա գլխի համար ԱՄՆ-ը նշանակել էր 5 մլն
դոլարի պարգեւ: Պաշտոնական մեկնաբանություններ Վաշինգտոնից առայժմ
չեն հնչել:
Նշվում է նաեւ, որ Պակիստանի իրավապահ մարմինները չեն
հաստատել Աբու Խաբաբ Մասրիի ոչնչացման մասին տեղեկատվությունը: