ՎԵՐՋԻՆ 5 ՏԱՐԻՆԵՐԻՆ ՀԹՄՄ-Ի «ՎԱՀԱՆ ԹԵՔԵՅԱՆ» ԱՄԵՆԱՄՅԱ
ՄՐՑԱՆԱԿԱԲԱՇԽՈՒԹՅԱՆԸ ՄԱՍՆԱԿՑԵԼ ԵՆ ՄՈՏ ՀԱԶԱՐ ԱՐՎԵՍՏԱԳԵՏՆԵՐ
05-05-2008 17:30:00 | Հայաստան | Մշակույթ
ԵՐԵՎԱՆ, 5 ՄԱՅԻՍԻ, ՆՈՅՅԱՆ ՏԱՊԱՆ: Հայաստանի Թեքեյան
մշակութային միությունը (ՀԹՄՄ) 2007թ.-ին ստեղծված արվեստի գործերի
համար կանցկացնի «Վահան Թեքեյան» ամենամյա մրցանակաբաշխություն:
Ինչպես մայիսի 5-ի ասուլիսում հայտնեց ՀԹՄՄ-ի նախագահ Ռուբեն
Միրզախանյանը, մրցույթը կանցկացվի «Գեղարվեստական գրականություն»,
«Երաժշտություն», «Գեղանկարչություն», «Քանդակագործություն»,
«Թատրոն», «Ռադիո եւ հեռուստատեսություն» անվանակարգերում, ինչպես
նաեւ մրցանակներ կշնորհվեն «Ազգ» օրաթերթում լավագույն
հրապարակման, սոցիալ-քաղաքական երգիծանքի, դպրոցականների եւ
մանուկների համար գրված ստեղծագործությունների համար:
Մրցույթին կարող են մասնակցել ստեղծագործողներ ինչպես
Հայաստանից, այնպես էլ Սփյուռքից: Հաղթողներին կհանձնվեն 1000-ական
ԱՄՆ դոլար դրամական պարգեւներ:
Ռ.Միրզախանյանը նշեց, որ «Վահան Թեքեյան»
մրցանակաբաշխությունը անցկացվում է 1990-ականներից: Վերջին 5
տարիներին այն առավել կազմակերպված բնույթ է կրում: «Վերջին 5
տարիներին մրցանակաբաշխությանը մասնակցել են մոտ 1000
արվեստագետներ: ՀԹՄՄ-ի մրցանակները շնորհվում են նրանց, ովքեր
իրենց ավանդն են ներդնում հայ մշակույթի զարգացման եւ տարածման
գործում»,- ընդգծեց Ռ.Միրզախանյանը:
Նշվեց նաեւ, որ գործերի ընդունման ժամկետը մայիսի 8-ից մինչեւ
դեկետմբերի 8-ն է: