ՏՏ ՈԼՈՐՏՈՒՄ ՏԱՐԱԾԱՇՋԱՆԱՅԻՆ ՄՐՑԱԿՑՈՒԹՅԱՆ ՄԵՋ ՀԱՅԱՍՏԱՆԸ ՊԵՏՔ
Է ՍՏԱՆՁՆԻ ԱՌԱՋԱՏԱՐԻ ԴԵՐԸ,- ԳՏՆՈՒՄ Է ՀՀ ՎԱՐՉԱՊԵՏԸ
22-04-2008 22:00:00 | Հայաստան | Տնտեսություն
ԵՐԵՎԱՆ, 22 ԱՊՐԻԼԻ, ՆՈՅՅԱՆ ՏԱՊԱՆ: Տրանսպորտի եւ կապի ոլորտը
չափազանց կարեւոր է Հայաստանի համար, հատկապես հաշվի առնելով
ներկայիս աշխարհաքաղաքական խնդիրները եւ առկա մարտահրավերները: Այս
մասին ապրիլի 22-ին ՀՀ Տրանսպորտի եւ կապի նախարարության
աշխատակազմին նորանշանակ նախարար Գուրգեն Սարգսյանին ներկայացնելիս
ասաց վարչապետ Տիգրան Սարգսյանը: Վարչապետը նշեց, որ կառավարության
գործունեության գերակա ուղղություններից է տեղեկատվական
տեխնոլոգիաների ոլորտը, եւ նախարարության աշխատանքի շնորհիվ պետք է
կարողանալ ոլորտում մտցնել այնպիսի բեկում, որ հնարավոր լինի
տարածաշրջանային մրցակցությունում ստանձնել առաջատարի դերը:
Անդրադառնլով նախկին նախարար Անդրանիկ Մանուկյանի
գործունեությանը, Տ.Սարգսյանը նշեց, որ նրան հաջողվել է ստեղծել
սերտ հարաբերություններ տարբեր երկրների` Ռուսաստանի, Իրանի,
Վրաստանի, Թուրքիայի եւ Ադրբեջանի, իր գործընկերների հետ, ինչը
պետք է պահպանել եւ զարգացնել:
Իր հերթին Ա.Մանուկյանը հայտնեց, որ հիմնականում ավարտվել է
միջպետական ճանապարհների շինարարությունը, վերակառուցվել է
հանրապետական նշանակության ճանապարհների մի մասը, սկսվել են մի
քանի ծրագրերով, այդ թվում նաեւ պետբյուջեի ֆինանսավորմամբ,
գյուղական ճանապարհների շինաշխատանքները: Արդեն ավարտվել են
ճապոնական բանկի հետ բանակցությունները. ճապոնական կողմը 130 մլն
դոլար է նախատեսում հատկացնել Հայաստանի գյուղական ճանապարհների
վերականգնման համար: Նախատեսվում է մինչեւ 2010թ.-ը հանրապետության
ճանապարհային ցանցն ամբողջությամբ վերականգնել:
Ա.Մանուկյանը նշեց, որ մինչեւ մայիսի 15-ը կավարտվեն Հայկական
երկաթուղու գույքագրման աշխատանքները, եւ հունիսի 1-ին այն արդեն
կհանձնվի Հարավ-Կովկասյան երկաթուղուն: