ԱՅՍ ՏԱՐԻ ԵՐԵՎԱՆԻ ԴՊՐՈՑՆԵՐԻ ՇՐՋԱՆԱՎԱՐՏՆԵՐԻ ԹԻՎԸ ԿԿԱԶՄԻ 11454
ԱՇԱԿԵՐՏ
24-03-2008 16:00:00 | Հայաստան | Հասարակություն
ԵՐԵՎԱՆ, 24 ՄԱՐՏԻ, ՆՈՅՅԱՆ ՏԱՊԱՆ: 2007-2008թթ.-ի ուստարում
Երեւանի դպրոցների շրջանավարտների թիվը կկազմի 11 454 աշակերտ:
Ինչպես մարտի 24-ի ասուլիսում նշեց Երեւանի քաղաքապետարանի
Կրթության վարչության պետ Օնիկ Վաթյանը, շրջանավարտները այս տարի
միասնական` կենտրոնացված, քննություն կհանձնեն «Հայոց լեզու եւ
գրականություն», «Մաթեմատիկա» եւ օտար լեզու առարկաններից: Ըստ
նրա, մարտի 16-ին ավարտվել է ավարտական դասարաններից հայտերի
ընդունում: Օ.Վաթյանը նշեց, որ նախնական տվյալների համաձայն, 19-ը
շրջանավարտ միասնական քննություն կհանձնի իսպաներեն եւ 2-ը`
պարսկերեն լեզուներից:
Նշվեց նաեւ, որ 2006-2007թթ.-ի ուստարվա առաջին կիսամյակի
համեմատ այս ուստարվա առաջին կիսամյակում զգալիորեն բարձրացել են
ուսման առաջադիմության եւ որակի ցուցանիշները: Այսպես, եթե անցյալ
ուստարվա առաջին կիսամյակում ուսման առաջադիմությունը կազմել է
91,6%, իսկ որակը 33%, ապա այս տարվա նույն ժամանակաշրջանում,
համապատասխանաբար, 93% եւ 35%: