ԳԱԳԻԿ ԾԱՌՈՒԿՅԱՆ. «ՀԱՅՐԵՆԱԿԱՆ ՍՊՈՐՏԸ ԱՐՄԱՏԱԿԱՆ
ՎԵՐԱՓՈԽՈՒՄՆԵՐԻ ԽԻՍՏ ԿԱՐԻՔ ՈՒՆԻ»
14-10-2008 17:48:00 | Հայաստան | Սպորտ
ԵՐԵՎԱՆ, 14 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Հոկտեմբերի 14-ին
Ֆիզիկական կուլտուրայի հայկական պետական ինստիտուտի դահլիճում տեղի
ունեցավ Հայաստանի մարզական ակտիվի համաժողով, որին մասնակցեցին
տարբեր մարզական գերատեսչությունների, ֆեդերացիաների,
մարզադպրոցների պատասխանատու աշխատողներ:
ՀՀ սպորտի եւ երիտասարդության հարցերի նախարար Արմեն
Գրիգորյանն իր ելույթում անդրադարձավ Պեկինի 29-րդ ամառային
օլիմպիական խաղերում Հայաստանի մարզիկների ունեցած մրցելույթների,
նշելով, որ նախորդի` Աթենքի օլիմպիադայի, համեմատ առաջընթացն
ակնհայտ է: Նախարարը դրական գնահատեց հատկապես հայ ծանրորդների
մրցելույթները: Միաժամանակ Ա.Գրիգորյանը հիշատակեց նաեւ
հանրապետության մարզադպրոցներում առկա բազմաթիվ թերությունները:
Հայաստանի ազգային օլիմպիական կոմիտեի նախագահ Գագիկ
Ծառուկյանի խոսքերով, հայրենական սպորտը արմատական վերափոխումների
խիստ կարիք ունի: Նա հայտնեց, որ ըմբշամարտի, բռնցքամարտի եւ
ձյուդոյի հանրապետական ֆեդերացիաների եւ այդ մարզաձեւերի
հավաքականների գլխավոր մարզիչների փոփոխություններ կկատարվեն: Ըստ
Գ.Ծառուկյանի, օլիմպիական քառամյա փուլում աշխարհի կամ Եվրոպայի
մեդալակիրներ չտված օլիմպիական հերթափոխի մարզադպրոցների
տնօրենները նույնպես իրենց տեղը կզիջեն արժանիներին: