ՌՈՒՍԱԿԱՆ «ՉԵԼՈՎԵԿ» ԹԱՏՐՈՆԻ «ԽԵՂԿԱՏԱԿԻ ԱՆԱՄՈՐՖՈԶՆԵՐ»
ՆԵՐԿԱՅՑՈՒՄՈՎ ԿՄԵԿՆԱՐԿԻ «ՀԱՅՖԵՍՏ» 6-ՐԴ ՄԻՋԱԶԳԱՅԻՆ ԹԱՏԵՐԱԿԱՆ
ՓԱՌԱՏՈՆԸ
03-10-2008 19:05:00 | Հայաստան | Մշակույթ
ԵՐԵՎԱՆ, 3 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Ռուսական «Չելովեկ»
շարժման թատրոնի «Խեղկատակի անամորֆոզներ» ներկայացմամբ հոկտեմբերի
4-ին Կ.Ստանիսլավսկու անվան ռուսական դրամատիկական թատրոնում
կմեկնարկի «ՀայՖեստ» 6-րդ միջազգային թատերական փառատոնը: Արդեն
6-րդ անգամ անցկացվող այս փառատոնի 8 օրերի ընթացքում երեւանյան 17
բեմահարթակներում կներկայացվեն աշխարհի 30 երկրների 45
թատերախմբերի 100 ներկայացումներ: Մեծ Բրիտանիայից, ԱՄՆ-ից,
Ռուսաստանից, Կանադայից, Գերմանիայից, Ավստրալիայից, Իտալիայից,
Իսպանիայից, Իսրայելից, Ֆրանսիայից եւ այլ երկրներից Երեւան
ժամանած թատերական խմբերը հայ հանդիսատեսին կներկայացնեն
բազմաժանր` մնջախաղի, դրամատիկական, տիկնիկային, խամաճիկների,
ինչպես նաեւ ժամանակակից պարի թատրոնների լավագույն
ներկայացումներ:
Մինչեւ «ՀայՖեստ»-ի պաշտոնական բացումը, Շառլ Ազնավուրի անվան
հրապարակում տեղի կունենա բացօթյա ներկայացում եւ հանդիսություն,
որին կմասնակցեն տարբեր թատերախմբեր:
Փառատոնի կազմակերպիչները հայտնել են, որ փառատոնին ներկա
կգտնվեն հանրաճանաչ արվեստագետներ, միջազգային փառատոնների
նախագահներ, թատերագետներ, որոնք տեղում կանցկացնեն սեմինարներ եւ
«կլոր սեղաններ»` նվիրված Հայաստանում մշակութային քաղաքականության
եւ արտմենեջմենթի զարգացմանը: