ՌՈՒՍԱԿԱՆ «ՉԵԼՈՎԵԿ» ԹԱՏՐՈՆԻ «ԽԵՂԿԱՏԱԿԻ ԱՆԱՄՈՐՖՈԶՆԵՐ»
ՆԵՐԿԱՅՑՈՒՄՈՎ ԿՄԵԿՆԱՐԿԻ «ՀԱՅՖԵՍՏ» 6-ՐԴ ՄԻՋԱԶԳԱՅԻՆ ԹԱՏԵՐԱԿԱՆ
ՓԱՌԱՏՈՆԸ
03-10-2008 19:05:00 | Հայաստան | Մշակոյթ
ԵՐԵՎԱՆ, 3 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Ռուսական «Չելովեկ»
շարժման թատրոնի «Խեղկատակի անամորֆոզներ» ներկայացմամբ հոկտեմբերի
4-ին Կ.Ստանիսլավսկու անուան ռուսական դրամատիկական թատրոնում
կմեկնարկի «հայֆեստ» 6-րդ միջազգային թատերական փառատոնը: Արդէն
6-րդ անգամ անցկացուող այս փառատոնի 8 օրերի ընթացքում երեւանեան 17
բեմահարթակներում կներկայացուեն աշխարհի 30 երկրների 45
թատերախմբերի 100 ներկայացումներ: Մեծ Բրիտանիայից, ԱՄՆ-ից,
Ռուսաստանից, Կանադայից, Գերմանիայից, Աուստրալիայից, Իտալիայից,
Իսպանիայից, Իսրայելից, Ֆրանսիայից եւ այլ երկրներից Երեւան
ժամանած թատերական խմբերը հայ հանդիսատեսին կներկայացնեն
բազմաժանր` մնջախաղի, դրամատիկական, տիկնիկային, խամաճիկների,
ինչպէս նաեւ ժամանակակից պարի թատրոնների լաւագոյն
ներկայացումներ:
Մինչեւ «հայֆեստ»-ի պաշտօնական բացումը, Շառլ Ազնաւուրի անուան
հրապարակում տեղի կունենայ բացօթեայ ներկայացում եւ հանդիսութիւն,
որին կմասնակցեն տարբեր թատերախմբեր:
Փառատոնի կազմակերպիչները յայտնել են, որ փառատօնին ներկայ
կգտնուեն հանրաճանաչ արուեստագէտներ, միջազգային փառատօնների
նախագահներ, թատերագետներ, որոնք տեղում կանցկացնեն սեմինարներ եւ
«կլոր սեղաններ»` նուիրուած Հայաստանում մշակոյթային քաղաքականութեան
եւ արտմենեջմենթի զարգացմանը: