ՀՀ ԿԲ-Ի ՆԱԽԱԳԱՀԸ ԿՄԱՍՆԱԿՑԻ ԳՀՀ-Ի ԴԻՏՈՐԴ ԽՈՐՀՐԴԻ ԵՎ ՄԱՍԾԲԵ-Ի
ԿԲ-ՆԵՐԻ ԿԱՌԱՎԱՐԻՉՆԵՐԻ ԱԿՈՒՄԲԻ ՆԻՍՏԵՐԻՆ
19-09-2008 20:48:00 | Հայաստան | Տնտեսություն
ԵՐԵՎԱՆ, 19 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: ՀՀ Կենտրոնական բանկի
նախագահ Արթուր Ջավադյանը սեպտեմբերի 20-24-ին գտնվելու է
Ֆրանկֆուրտում, որտեղ մասնակցելու է Գերմանա-հայկական հիմնադրամի
(ԳՀՀ) դիտորդ խորհրդի հերթական նիստին: Ինչպես «ՆՈՅՅԱՆ ՏԱՊԱՆ»-ին
հայտնեցին ՀՀ ԿԲ-ի Հասարակայնության հետ կապերի ծառայությունից,
խորհրդի նիստում քննարկվելու են միկրո, փոքր եւ միջին
ձեռնարկությունների աջակցության, հիփոթեքային շուկայի եւ
վերականգնվող էներգետիկայի զարգացման վարկային ծրագրերի հարցերը:
Ա.Ջավադյանը Ֆրանկֆուրտում հանդիպելու է նաեւ Եվրոպական
կենտրոնական բանկի ներկայացուցիչների հետ:
Սեպտեմբերի 25-27-ին նա մասնակցելու է Միջին Ասիայի,
Սեւծովյան տարածաշրջանի եւ բալկանյան երկրների (ՄԱՍԾԲԵ)
կենտրոնական բանկերի կառավարիչների ակումբի 20-րդ նիստին: Այս
նիստում քննարկվելու են «Սպառողներ, թափանցիկություն եւ ֆինանսական
հատվածի անկայունություն», «Կապիտալի ազատականացում. խնդիրներ եւ
մարտահրավերներ» ու «Ֆինանսական կայունության հաշվետվություններ.
ինչպես դիմագրավել նոր մարտահրավերներին» թեմաները: