ԵՐԵՎԱՆ, 11 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Համաշխարհային բանկի «Գործարարություն 2009» տարեկան 6-րդ զեկույցում ներառված 181 երկրների ցուցակում Հայաստանը զբաղեցնում է 44-րդ տեղը: Անցյալ տարի 178 երկրների շարքում Հայաստանը զբաղեցրել էր 41-րդ տեղը: Ըստ զեկույցի, տարվա ընթացքում երկրի դատական համակարգը վերակազմակերպվել է, կատարելագործվել է դատավարական օրենսգիրքը: Հեշտացվել է պայմանագրերի կիրարկումը` մեկ ընթացակարգ վերացնելու եւ առեւտրային վեճերի կարգավորման համար պահանջվող ժամանակի կրճատման շնորհիվ: Հայաստանը զգալիորեն կրճատել է Երեւանում շինարարական թույլտվությունների ստացման ծախսը` վերացնելով նախագծման իրավունքի ձեռք բերման համար պարտադիր վճարները: Համաշխարհային բանկի երեւանյան գրասենյակի հաղորդագրության համաձայն, զեկույցի կազմման համար երկրների տնտեսությունները գնահատվում են ըստ գործարարության կարգավորման տասը` բիզնես սկսելու, շինարարական թույլտվությունների, աշխատակիցներ վարձելու, գույքի գրանցման, վարկ ստանալու, ներդնողների պաշտպանության, սահմանային առեւտրի, պայմանագրերի կիրարկման եւ բիզնեսը փակելու կանոնակարգերի ոլորտներում առաջընթացի ցուցանիշների:

---