2008 Թ.-Ի ՀՈՒՆՎԱՐ-ՀՈՒԼԻՍԻՆ ՆԱԽՈՐԴ ՏԱՐՎԱ ՆՈՒՅՆ
ԺԱՄԱՆԱԿԱՀԱՏՎԱԾԻ ՀԱՄԵՄԱՏ ՀՀ ՊԵՏԲՅՈՒՋԵԻ ՀԱՐԿԱՅԻՆ ԵԿԱՄՈՒՏՆԵՐԸ
33,1%-ՈՎ ԱՃԵԼ ԵՆ
27-08-2008 07:12:00 | Հայաստան | Տնտեսություն
ԵՐԵՎԱՆ, 27 ՕԳՈՍՏՈՍԻ, ՆՈՅՅԱՆ ՏԱՊԱՆ: 2008թ.-ի
հունվար-հուլիսին ՀՀ պետական բյուջեի եկամուտների 79,4%-ը
ձեւավորվել է հարկային մուտքերի հաշվին, պետական տուրքը կազմել է
բյուջեի եկամուտների 2,9%-ը, պարտադիր սոցիալական ապահովության
վճարները` 13,3%-ը, պաշտոնական դրամաշնորհները` 0,7%-ը, այլ
եկամուտները` 3,7%-ը: «Հայաստանի Հանրապետության 2008 թվականի
պետական բյուջեի մասին» ՀՀ օրենքի 9-րդ հոդվածի 18-րդ կետին
համապատասխան պետական բյուջեում ներառվել են նաեւ պետական
հիմնարկների արտաբյուջետային ֆոնդերի միջոցները, որոնց եկամուտները
նշված ժամանակահատվածում կազմել են ավելի քան 9,1 մլրդ դրամ (մոտ
29,66 մլն ԱՄՆ դոլար)` նախորդ տարվա 6,7 մլրդ դրամի դիմաց:
ՀՀ Ֆինանսների նախարարության տվյալներով, այս տարվա առաջին
յոթ ամիսներին ՀՀ պետբյուջեի հարկային եկամուտները կազմել են ավելի
քան 328,6 մլրդ դրամ, ինչով 76,9%-ով ապահովվել է իննամսյա ծրագիրը
եւ 55,3%-ով` տարեկան ծրագիրը: 2007թ.-ի նույն ժամանակահատվածի
համեմատ հարկային եկամուտներն աճել են 33,1%-ով կամ 81,8 մլրդ
դրամով: Ընդ որում, գրեթե բոլոր հարկատեսակների գծով (բացառությամբ
պարզեցված հարկի) արձանագրվել են աճի բարձր տեմպեր:
2008թ.-ի հունվար-հուլիսին ՀՀ պետբյուջե մուտքագրված
ավելացված արժեքի հարկի ծավալը կազմել է ավելի քան 170,6 մլրդ
դրամ, ինչով ապահովվել է հարկային եկամուտների 51,9%-ը: Նշված
գումարից 109,7 մլրդ դրամը ստացվել է ՀՀ սահմանին հարկումից, 60,9
մլրդ դրամը` ապրանքների եւ ծառայությունների ներքին
շրջանառությունից: 2007թ.-ի նույն ժամանակահատվածի համեմատ պետական
բյուջե մուտքագրված ԱԱՀ-ն աճել է 43,3%-ով կամ շուրջ 51,6 մլրդ
դրամով: Ընդ որում, ավելացել են եւ' ներմուծումից, եւ' ներքին
շրջանառությունից ստացվող գումարները:
Նշված ժամանակահատվածում ակցիզային հարկի գծով մուտքերը
կազմել են շուրջ 24,5 մլրդ դրամ, ինչով ապահովվել է հարկային
եկամուտների 7,4%-ը: Մասնավորապես, հանրապետություն ներմուծված
ենթաակցիզային ապրանքների հարկումից ստացվել է ավելի քան 17,1 մլրդ
դրամ, որից 7,6 մլրդ դրամը` բենզինի եւ դիզելային վառելիքի, 7,1
մլրդ դրամը` ծխախոտի ներմուծումից: Հանրապետությունում արտադրվող
ենթաակցիզային ապրանքների հարկումից պետական բյուջեի մուտքերը
կազմել են 7,3 մլրդ դրամ, որից 3,3 մլրդ դրամը ստացվել է ներքին
արտադրության ծխախոտի իրացումից: Նախորդ տարվա նույն
ժամանակահատվածի համեմատ ակցիզային հարկի մուտքերն աճել են
11,5%-ով կամ ավելի քան 2,5 մլրդ դրամով, ինչը հիմնականում
պայմանավորված է բենզինի ու ծխախոտի ներմուծումից եւ տեղական
արտադրության ծխախոտի իրացումից ստացված մուտքերի աճով: Ակցիզային
հարկի աճ է արձանագրվել նաեւ ներմուծվող եւ տեղական արտադրության
ալկոհոլային խմիչքների իրացումից:
2007թ.-ի առաջին յոթ ամիսներին պետբյուջեի հարկային
եկամուտների 16,3%-ն ապահովվել է շահութահարկի հաշվին, որի ծավալը
կազմել է շուրջ 53,4 մլրդ դրամ: Նախորդ տարվա նույն
ժամանակահատվածի համեմատ շահութահարկի գծով մուտքերն աճել են
24,4%-ով կամ շուրջ 10,5 մլրդ դրամով, ինչը հիմնականում
պայմանավորված է ոչ պետական կազմակերպությունների, նվազագույն
շահութահարկի վճարման պահանջից ելնելով մեկ տոկոս դրույքաչափով
վճարումների եւ ֆինանսավարկային կազմակերպությունների վճարած
շահութահարկի աճով: