2008 Թ.-Ի ԱՌԱՋԻՆ ԿԻՍԱՄՅԱԿՈՒՄ ՆԱԽՈՐԴ ՏԱՐՎԱ ՆՈՒՅՆ
ԺԱՄԱՆԱԿԱՀԱՏՎԱԾԻ ՀԱՄԵՄԱՏ ՀՀ ՊԵՏԲՅՈՒՋԵԻ ՀԱՐԿԱՅԻՆ ԵԿԱՄՈՒՏՆԵՐԸ
34,9%-ՈՎ ԱՃԵԼ ԵՆ
16-08-2008 18:52:00 | Հայաստան | Տնտեսություն
ԵՐԵՎԱՆ, 16 ՕԳՈՍՏՈՍԻ, ՆՈՅՅԱՆ ՏԱՊԱՆ: 2008թ.-ի առաջին
կիսամյակում ՀՀ պետական բյուջեի հարկային եկամուտները կազմել են
ավելի քան 275 մլրդ դրամ (մոտ 894,1 մլն ԱՄՆ դոլար), ինչով
կիսամյակային ծրագիրն ապահովվել է 105,1%-ով, իսկ տարեկան ծրագիրը`
47,3%-ով: 2007թ.-ի նույն ժամանակահատվածի համեմատ հարկային
եկամուտներն աճել են 34,9%-ով կամ 71,1 մլրդ դրամով: Ընդ որում,
գրեթե բոլոր հարկատեսակների գծով (բացառությամբ պարզեցված հարկի)
արձանագրվել են աճի բարձր տեմպեր:
ՀՀ Ֆինանսների նախարարության լրատվական ծառայության
տվյալներով, այս տարվա հունվա-հունիսին ավելացված արժեքի հարկը
կազմել է ավելի քան 141,6 մլրդ դրամ, ինչը կազմել է հարկային
եկամուտների 51,5%-ը: Նշված գումարից 88,4 մլրդ դրամը ստացվել է ՀՀ
սահմանին հարկումից, 53,2 մլրդ դրամը` ապրանքների եւ
ծառայությունների ներքին շրջանառությունից: 2007թ.-ի նույն
ժամանակահատվածի համեմատ պետական բյուջե մուտքագրված ԱԱՀ-ն աճել է
46,3%-ով կամ շուրջ 44,8 մլրդ դրամով: Ընդ որում, ավելացել են ե'ւ
ներկրումից, ե'ւ ներքին շրջանառությունից ստացվող գումարները:
Այս տարվա առաջին կիսամյակում ակցիզային հարկի մուտքերը
կազմել են շուրջ 20,9 մլրդ դրամ, ինչով ապահովվել է հարկային
եկամուտների 7,6%-ը: Մասնավորապես, հանրապետություն ներկրված
ենթաակցիզային ապրանքների հարկումից ստացվել է շուրջ 14,2 մլրդ
դրամ, որից 6,3 մլրդ դրամը` բենզինի եւ դիզելային վառելիքի, 5,8
մլրդ դրամը` ծխախոտի ներկրումից:
Հանրապետությունում արտադրվող ենթաակցիզային ապրանքների
հարկումից պետական բյուջեի մուտքերը կազմել են 6,7 մլրդ դրամ, որից
շուրջ 3 մլրդ դրամը ստացվել է ներքին արտադրության ծխախոտի
իրացումից:
Նախորդ տարվա նույն ժամանակահատվածի համեմատ ակցիզային հարկի
մուտքերն աճել են 16,9%-ով կամ ավելի քան 3 մլրդ դրամով, ինչը
հիմնականում պայմանավորված է բենզինի ու ծխախոտի ներկրման եւ
տեղական արտադրության ծխախոտի իրացման գծով մուտքերի աճով:
Ակցիզային հարկի աճ է արձանագրվել նաեւ ներկրվող եւ տեղական
արտադրության ալկոհոլային խմիչքների գծով: