ՄԵԾԱՑԵԼ ԵՆ ATLANTIK FORFAITERIUNGS AG-Ի ԿՈՂՄԻՑ
«ԱՐԴՇԻՆԻՆՎԵՍՏԲԱՆԿ»-ԻՆ ՏՐԱՄԱԴՎՈՂ ԱՐՏԱՔԻՆ ԱՌԵՎՏՐԻ ՖԻՆԱՆՍԱՎՈՐՄԱՆՆ
ՈՒՂՂՎԱԾ ՎԱՐԿԱՅԻՆ ԳԾԻ ՉԱՓԸ ԵՎ ԺԱՄԿԵՏՆԵՐԸ
15-07-2008 14:56:00 | Հայաստան | Տնտեսություն
ԵՐԵՎԱՆ, 15 ՀՈՒԼԻՍԻ, ՆՈՅՅԱՆ ՏԱՊԱՆ: Շվեյցարական Atlantik
Forfaiterungs AG ընկերության կողմից «Արդշինինվեստբանկ»-ին
տրամադրվող արտաքին առեւտրի ֆինանսավորմանն ուղղված վարկային գծի
սահմանաչափը մեծացվել է` կազմելով 2,5 մլն ԱՄՆ դոլար, մինչեւ 5
տարի մարման ժամկետով: Ըստ «Արդշինինվեստբանկ» ՓԲԸ-ի մամլո
ծառայության հաղորդագրության, վարկային գծի պայմանների վերանայման
մասին որոշումն ընդունվել է հունիսի 16-ին Atlantik Forfaiterungs
AG ընկերության տնօրեն Պիտեր Դորնաուերի հետ կայացած
բանակցություններից հետո:
Atlantik Forfaiterungs AG ընկերությունը, որի հետ
«Արդշինինվեստբանկ»-ը համագործակցում է 2006 թվականից, զբաղվում է
արտահանման եւ ներմուծման կարճաժամկետ, միջնաժամկետ եւ երկաժամկետ
գործունեության ֆինանսավորմամբ: Այն հանդիսանում է եվրոպական
ֆորֆեյթինգային շուկայի առաջատար եւ փորձառու ընկերություններից
մեկի` German Oetker Group կազմակերպության, անդամ, որը 1960-ական
թվականներից ակտիվ գործունեություն է իրականացնում բանկային,
ապահովագրական, սննդի արդյունաբերության եւ հյուրանոցային բիզնեսի
ոլորտներում:
Արդշինինվեստբանկի վարչության նախագահ Արամ Անդրեասյանի
խոսքերով, «համագործակցությունը նմանատիպ փորձառու
կազմակերպությունների հետ հնարավորություն է տալիս է'լ ավելի
բարձրացնել մեր հաճախորդների սպասարկման մակարդակը, մատուցել
եվրոպական ամենաբարձր չափանիշներին համապատասխան ֆինանսական
ծառայություններ` պահպանելով «Արդշինինվեստբանկ»-ի ՀՀ բանկային
շուկայում ձեռք բերած վստահելի եւ կայուն բանկի համբավը»: