ՓԱՐԻԶ, 3 ՀՈՒԼԻՍԻ, ՆՈՅՅԱՆ ՏԱՊԱՆ: Հինգշաբթի Փարիզի
կլինիկաներից մեկում վախճանվել է Զամբիայի նախագահ Լեւի
Մվանավասան: Այս մասին հաղորդում է «Նովոստի» գործակալությունը`
վկայակոչելով հարավաֆրիկյան Talk Radio 702 ռադիոկայանի
հաղորդումը:
59-ամյա Մվանավասայի մահը վրա է հասել հինգշաբթի վաղ
առավոտյան: Զամբիայի առաջնորդի մահվան պատճառների մասին առայժմ
ոչինչ չի հաղորդվում:
Անցած կիրակի Մվանավասան հիպերտոնիկ նոպայից հետո շտապ
տեղափոխվել էր հիվանդանոց եգիպտական Շարմ աշ-Շեյխ առողջարանային
քաղաքում, ուր նա ժամանել էր մասնակցելու աֆրիկյան պետությունների
11-րդ գագաթնաժողովին: Երեքշաբթի Զամբիայի նախագահը փոխադրվել էր
Փարիզ: