ԲՐՅՈՒՍԵԼ, 27 ՄԱՐՏԻ, ՆՈՅՅԱՆ ՏԱՊԱՆ: Եվրախորհրդարանի նախագահ
Հանս-Գերտ Պոտտերինգը Տիբեթի հոգեւոր առաջնորդ դալայ-լամային
հրավիրել է ելույթ ունենալու ԵՄ օրենսդրական մարմնի պատգամավորների
առջեւ եւ պատմելու նրանց Լհասայի վերջին իրադարձությունների մասին,
որտեղ Տիբեթին անկախություն տրամադրելու պահանջով չարտոնված
ցույցերը ճնշվեցին չինական ոստիկանության կողմից, հաղորդում է
Reuters գործակալությունը:
«Դալայ-լամային ուրախությամբ կդիմավորեն այս դահլիճում, երբ
էլ նա ցանկություն հայտնի գալու»,- ասել է Եվրախորհրդարանի
ղեկավարը:
Հանս-Գերտ Պոտտերինգը ավելի վաղ չէր բացառել Եվրամիության
կողմից Պեկինի օլիմպիական խաղերը բոյկոտելու հնարավորությունը, եթե
Չինաստանի իշխանությունները չկարգավորեն Տիբեթի հուզումների հետ
կապված լարված իրադրությունը:
Լհասայում մարտի 10-ին հուզումներ սկսվեցին Տիբեթի
մայրաքաղաքում ապստամբության 49-րդ տարելիցին նվիրված ցույցերի
ժամանակ, որն ավարտվել էր Դալայ-լամայի արտաքսմամբ: Ըստ պաշտոնական
տվյալների, զոհվել են առնվազն 18 խաղաղ բնակիչներ եւ մեկ ոստիկան:
Դալայ-լամայի կողմնակիցները հաղորդել են նվազագույնը 100 մարդու
մահվան մասին: