ՊԱՐԵՆԱՄԹԵՐՔԻ ԳՆԵՐԸ ՀԱՅԱՍԱՏԱՆՈՒՄ ԱՎԵԼԻ ԴԱՆԴԱՂ ԵՆ ԱՃՈՒՄ, ՔԱՆ
ԱՐՏԵՐԿՐՈՒՄ
26-03-2008 20:26:00 | Հայաստան | Տնտեսություն
ԵՐԵՎԱՆ, 26 ՄԱՐՏԻ, ՆՈՅՅԱՆ ՏԱՊԱՆ: ԱՄՆ դոլարի նկատմամբ
հայկական դրամի արժեւորումը նպաստում է Հայաստանում գների աճի
զսպմանը, ինչով, մասնավորապես, բացատրվում են այլ երկրների համեմատ
գների աճի ցածր տեմպերը: Այս մասին հայտնեց ՀՀ առեւտրի եւ
տնտեսական զարգացման նախարար, Ներքին շուկայում սպառողական
ապրանքների գների ուսումնասիրման միջգերատեսչական աշխատանքային
խմբի ղեկավար Ներսես Երիցյանը` խմբի մարտի 26-ի նիստում:
Նշենք, որ աշխատանքային խումբն ստեղծվել է 2007թ.-ի
դեկտեմբերին` ՀՀ վարչապետի հանձնարարականով:
Աշխատանքային խմբի անդամ, ՀՀ առեւտրի եւ տնտեսական զարգացման
փոխնախարար Վահրամ Ղուշչյանը նշեց, որ մոնիտորինգի են ենթարկվել
սպառողական զամբյուղում ներառված առաջին անհրաժեշտության 6
ապրանքատեսակների` հացահատիկի, ալյուրի, ձեթի, շաքարավազի, կարագի
եւ բրնձի, գները: Նրա տվյալներով, այս տարվա փետրվարին 2007թ.-ի
փետրվարի համեմատ արձանագրվել է հացահատիկի 26,1%, արեւածաղկի ձեթի
46,9%, բրնձի 12,1%, ալյուրի 32,5%, պանրի 5,6% գների աճ: Կարագի
եւ շաքարավազի գները նվազել են, համապատասխանաբար, 4,9%-ով եւ
16,3%-ով:
Այս տարվա մարտի 25-ին փետրվարի նկատմամբ հացի գինն աճել է
13%-ով, ալյուրի գինը` 9,7%-ով, կլորավուն բրնձի գինը` 29,6%-ով.
իսկ երկարավուն բրնձի գինը նվազել է 15%-ով: Բուսական յուղի որոշ
տեսակների գները նվազել են մինչեւ 6,5%-ով, մյուսների գներն աճել
են մինչեւ 5,8%-ով, կարագի որոշ տեսակների գներն աճել են մինչեւ
2,1%-ով, մյուսների գները` նվազել մինչեւ 3%-ով: Շաքարավազի գինն
աճել է 5,9%-ով:
Նշվեց նաեւ, որ ՄԱԿ-ի Պարենի եւ գյուղատնտեսության
կազմակերպության (FAO) տվյալներով 2007թ.-ին սննդամթերքի (այդ
թվում` նշված աշխատանքային խմբի կողմից մոնիտորինգի ենթարկված
ապրանքների) գները միջազգային շուկայում եւս աճել են, իսկ
սննդամթերքի գների միջին ինդեքսը կազմել է 157%`, ինչը 23%-ով
բարձր է 2006թ.-ի ցուցանիշից: Մասնավորապես, եթե 2007թ.-ի
դեկտեմբեր - 2008թ.-ի հունվար ժամանակահատվածում ցորենի 1 տոննայի
միջազգային գինը կազմել է շուրջ 370 դոլար, ապա փետրվարի 27-ին
արդեն` 446 դոլար, իսկ մայիսի համար հայտարարված ֆյուչերային
գործարքներով` 540 դոլար: 2007թ.-ին Թայլանդում բրնձի 1 տոննայի
միջին գինը կազմել է 500 դոլար, իսկ Չիկագոյի ապրանքային բորսայում
այն հասել է 400 դոլարի, ինչը նախորդ տարվա ցուցանիշը գերազանցում
է ավելի քան 75%-ով: FAO-ի տվյալներով, համաշխարհային շուկայում
գրանցվել է նաեւ կարագի 50% եւ կաթնամթերքի 80% գների աճ:
Փոխնախարարի խոսքերով, միջազգային փորձագետների
գնահատականների համաձայն, սննդամթերքի միջազգային գների աճի
հիմնական պատճառը նավթի միջազգային գների աննախադեպ աճն է եւ
դրանով պայմանավորված` կենսավառելիքի արտադրության ծավալների աճը,
ինչն իր հերթին նպաստել է հացահատիկի, ճակնդեղի, սոյայի գների
կայուն բարձր մակարդակի պահպանմանը: Նշված գների աճին նպաստում է
նաեւ սննդամթերքի սպառման ծավալների աճը, ինչը հիմնականում
պայմանավորված է զարգացող երկրներում, հատկապես, Չինաստանում եւ
Հնդկաստանում սննդամթերքի սպառման աճի հետ: Ընդ որում, արձանագրվող
բոլոր ցուցանիշերը կանխատեսում են, որ գնաճը մինչեւ 2020թ.-ը
շարունակական միտում է ունենալու:
Ըստ փոխանախարի, FAO-ի կանխատեսումներով, համաշխարհային
պարենային ապահովության ծրագրի իրականացման համար անհրաժեշտ է մոտ
500 մլն դոլար: Նշվեց, որ Հայաստանի պարենային անվտանգության եւ
ներքին գների պաշտպանության համար ՀՀ կառավարությունը ձեռնարկում է
պարենամթերքի ներքին արտադրության խթանմանը նպաստող քայլեր: Այդ
նպատակով 2008թ.-ին նախատեսվել է գյուղատնտեսության բյուջետային
սուբսիդավորում` 1 մլրդ 600 մլն դրամ (մոտ 5,2 մլն ԱՄՆ դոլար)
ծավալով: