ՍԵՐԺ ՍԱՐԳՍՅԱՆ. «ՌԴ-Ի ԿԱՌԱՎԱՐՈՒԹՅԱՆ ՂԵԿԱՎԱՐԻ ՀԵՏ
ԲԱՆԱԿՑՈՒԹՅՈՒՆՆԵՐԸ ԱՆՑԵԼ ԵՆ ԼԻԱԿԱՏԱՐ ՓՈԽԸՄԲՌՆՄԱՆ ՊԱՅՄԱՆՆԵՐՈՒՄ»
06-02-2008 19:40:00 | Հայաստան | Տնտեսություն
ԵՐԵՎԱՆ, 6 ՓԵՏՐՎԱՐԻ, ՆՈՅՅԱՆ ՏԱՊԱՆ: Ռուսաստանի Դաշնության
կառավարության ղեկավարի հայաստանյան այցի շրջանակներում կայացած
«բանակցություններն անցել են լիակատար փոխընբռնման պայմաններում»:
Այս մասին ՀՀ Ազգային Ժողովի փետրվարի 6-ի նիստում հայտնեց
վարչապետ Սերժ Սարգսյանը: Ըստ նրա` նույն օրը կողմերը ստորագրել են
վեց փաստաթուղթ` ի լրումն նախկինում ստորագրված 170 փաստաթղթի:
«Մենք Ռուսաստանի կառավարության ղեկավարի այցը դիտարկել ենք
որպես անցյալ տարվա աշնանը Մոսկվա կատարած իմ այցի
շարունակություն»,- ասաց վարչապետը` նշելով, որ անհրաժեշտություն
էր առաջացել ամփոփելու այս ժամանակահատվածում կատարված աշխատանքի
արդյունքները: Ս.Սարգսյանը նաեւ նշեց, որ երկու երկրների
կառավարությունների ղեկվարների համոզմամբ համագործակցության 2007թ.
արդյունքները գոհացուցիչ են. հայ-ռուսական ապրանքաշրջանառության
ծավալը աճել է ավելի քան 60 տոկոսով եւ հասել 700 մլն ԱՄՆ դոլարի
սահմանագծին: «Բայց նշեցինք նաեւ, որ կան բազմաթիվ ռեզերվներ եւ
շատ կարճ ժամանակում մենք ուղղակի պարտավոր ենք այդ նիշը հասցնել 1
մլրդ ԱՄՆ դոլարի»,- հայտնեց Ս.Սարգսյանը: Նրա խոսքերով, «իրոք
հնարավորությունները մեծ են», մասնավորապես, հաշվի առնելով
հայկական երկաթուղին ռուսական երկաթուղուն կոնցեսիոն կառավարման
տալու փաստը: Վարչապետի համոզմամբ, դա կնպաստի, որ ՌԴ-ում մեծ
պահանջարկ ունեցող հայկական շինանյութերը մրցունակ լինեն այդ երկրի
տարածքում: