ՀՀ ՄՇԱԿՈՒՅԹԻ ՆԱԽԱՐԱՐՈՒԹՅՈՒՆՆ ԱՅՍ ՏԱՐԻ ԱՆՑԿԱՑՆԵԼՈՒ Է ՈՉ
ՆՅՈՒԹԱԿԱՆ ՄՇԱԿՈՒԹԱՅԻՆ ԺԱՌԱՆԳՈՒԹՅԱՆ ՊԱՀՊԱՆՈՒԹՅԱՆԸ ԵՎ ԶԱՐԳԱՑՄԱՆԸ
ՆՎԻՐՎԱԾ ՄՐՑՈՒՅԹՆԵՐ
16-01-2008 17:35:00 | Հայաստան | Մշակույթ
ԵՐԵՎԱՆ, 16 ՀՈՒՆՎԱՐԻ, ՆՈՅՅԱՆ ՏԱՊԱՆ: Այս տարի ՀՀ Մշակույթի
նախարարությունը անցկացնելու է մի շարք մրցույթներ, որոնցից
յուրաքանչյուրը կնպաստի հայկական մշակույթի զարգացմանը: Այս մասին
հունվարի 16-ի ասուլիսում հայտնեց ՀՀ մշակույթի փոխնախարար Կարինե
Խոդիկյանը:
Ըստ նրա, ազգային ոչ նյութական մշակութային ժառանգության
պահպանության, տարածման եւ զարգացման, ժողովրդական
տոնակատարությունների, ազգագրական փառատոների կազմակերպումը
խթանելու նպատակով նախարարությունը հայտարարելու է ազգագրական
համույթների դրամաշնորհային մրցույթ: Մրցույթին կարող են մասնակցել
3 տարվա գործունեության փորձ եւ 2 համերգային ծրագիր ունեցող
Հայաստանի տարբեր շրջաններում գործող ազգագրական համույթներ, որոնք
իրենց գործունեությամբ նպաստում են տվյալ բնակավայրի
բանահյուսության եւ ազգագրության ավանդույթների պահպանմանն ու
տարածմանը: Մրցույթն անցկացվելու է 3 փուլով: 3 հաղթողներին
կհատկացվեն դրամաշնորհներ` 5-ական մլն դրամի չափով (մոտ 16 հազ.
ԱՄՆ դոլար):
Հայտարարվելու է նաեւ հեռուստատեսային եւ ռադիոհաղորդումների
նախագծերի մրցույթ: Հաղորդումները պետք է լինեն 15-30 րոպեանոց`
նվիրված ոչ նյութական մշակութային ժառանգության որեւէ կողմին`
արհեստներ, բանահյուսություն, ազգային ծեսեր եւ այլն: Մրցույթին
կարող են մասնակցել առնվազն 3 հեռուստահաղորդման հեղինակներ:
Գրահրատարակչական, գրահրատարակիչների համագործակցության,
հրատարակչական լավագույն տեխնոլոգիաների քարոզչության նպատակով
անցկացվելիք մրցույթի գլխավոր մրցանակակրին կհանձնվի արձանիկ եւ
100 հազ. դրամ պարգեւ:
Այս տարի Մշակույթի նախարարությունը կանցկացնի նաեւ «Գրանշան
2008» տառատեսակների առաջին միջազգային մրցույթը, որին կարող են
մասնակցել ինչպես Հայաստանի, այնպես էլ արտերկրի քաղաքացիներ եւ
կազմակերպություններ: Մրցույթում լավագույն ճանաչված տառատեսակների
հեղինակը կստանա գլխավոր մրցանակ եւ 100 հազ. դրամ պարգեւ, իսկ
երկրորդ եւ երրորդ տեղերը գրաված մասնակիցները` պատվոգրեր: