ԱՌՈՂՋԱՊԱՀՈՒԹՅԱՆ ՆԱԽԱՐԱՐՈՒԹՅՈՒՆԸ ԱՎԵԼԻ ՔԱՆ 1 ՏԱՐԻ Է ՉԻ
ԶԲԱՂՎՈՒՄ ՍՆՆԴԻ ՈՐԱԿԻ ՎԵՐԱՀՍԿՈՂՈՒԹՅԱՄԲ
16-11-2007 16:50:00 | Հայաստան | Հասարակություն
ԵՐԵՎԱՆ, 16 ՆՈՅԵՄԲԵՐԻ, ՆՈՅՅԱՆ ՏԱՊԱՆ: ՀՀ Առողջապահության
նախարարությունն արդեն մեկ տարուց ավելի է չի զբաղվում սննդի
վերահսկողությամբ: Ինչպես «ՆՈՅՅԱՆ ՏԱՊԱՆ»-ի թղթակցին հայտնեցին
նախարարությունից, այդ գործառույթը ներկայումս իրականացնում է ՀՀ
Գյուղատնտեսության նախարարությունը:
Նշենք, որ ըստ ոստիկանության, հիմնավոր կասկած կա, որ
քլորացված է ոչ միայն «Նոյ», այլեւ «Բջնի» հանքային ջուրը, եւ
դրանց նմուշ-օրինակները ուղարկվել են ՀՀ Առողջապահության եւ
Առեւտրի ու արդյունաբերական զարգացման նախարարություններ, որտեղից
փորձագիտական եզրակացությունները կստացվեն մոտ ապագայում:
Հիշեցնենք, որ ՀՀ Ոստիկանության Կազմակերպված հանցագործության
դեմ պայքարի` 6-րդ, վարչության աշխատակիցները «Բջնի» հանքային
ջրերի գործարանից առգրավվել էին համակարգիչները, ինչի պատճառով
գործարանը մեկ շաբաթից ավելի չէր աշխատում: «Սիլ Կոնցեռն»-ի
գրասենյակից «ՆՈՅՅԱՆ ՏԱՊԱՆ»-ի թղթակցին հայտնեցին, որ թեեւ
համակարգիչները չեն վերադարձվել, այդուհանդերձ գործարանն արդեն
սկսել է աշխատել: