ԴԱՆԻԱՅԻ ԿԱՌԱՎԱՐՈՒԹՅՈՒՆԸ ՆԱԽԱՏԵՍՈՒՄ Է 5 ՄԼՆ ԴՈԼԱՐ ՎԱՐԿԱՅԻՆ
ՄԻՋՈՑՆԵՐ ՏՐԱՄԱԴՐԵԼ ՀԱՅԱՍՏԱՆԻՆ` ԱԳՐՈՏՈՒՐԻԶՄԻ ԶԱՐԳԱՑՄԱՆ ՆՊԱՏԱԿՈՎ
06-11-2007 20:00:00 | Հայաստան | Տնտեսություն
ԵՐԵՎԱՆ, 6 ՆՈՅԵՄԲԵՐԻ, ՆՈՅՅԱՆ ՏԱՊԱՆ: ՀՀ Ֆինանսների եւ
էկոնոմիկայի նախարարության «Գյուղական ֆինանսավորման կառույց»
ծրագրերի իրականացման գրասենյակ-պետական հիմնարկի (ԳՖԿ) եւ Դանիայի
կառավարության միջեւ նախնական պայմանավորվածություն է ձեռք բերվել
այն մասին, որ Դանիայի կառավարությունը 5 մլն ԱՄՆ դոլար վարկային
միջոցներ կհատկացնի` Հայաստանում ագրոտուրիզմի զարգացման նպատակով:
Այս մասին «ՆՈՅՅԱՆ ՏԱՊԱՆ»-ի թղթկցի հետ զրույցի ժամանակ հայտնեց
ԳՖԿ-ի տնօրեն Արա Մուրադյանը:
Նրա խոսքերով, նշված վարկային ծրագրի իրականացումը մի քանի
մարզերում կարող է 1-2 տարվա ընթացքում էապես նպաստել տեղի
բնակչության եկամուտների աճին, հետեւաբար նաեւ` սպառման տեղական
շուկաների ընդլայնմանը:
ԳՖԿ-ի տնօրենի գնահատմամբ, գյուղական բնակավայրերի զարգացման
խնդիրները պետք է լուծվեն ոչ միայն գյուղատնտեսությանը նպաստելով:
Ըստ նրա, նախատեսվում է, որ ԻՖԱԴ-ի եւ ՀԲ-ի միջոցներով
կիրականացվեն նոր վարկային ծրագրեր, որոնց շրջանակներում
կվարկավորվեն գյուղբնակավայրերի ոչ միայն գյուղատնտեսական, այլեւ
այլ ոլորտների ձեռնարկությունները:
Նշվեց, որ ԳՖԿ-ի ուսումնասիրությունների համաձայն, օրինակ,
Տավուշի մարզում ֆինանսական ռեսուրսների պահանջարկը ոչ
գյուղատնտեսական ոլորտի ձեռնարկություններում շատ ավելի մեծ է, քան
գյուղատնտեսության ոլորտում: «Եթե հատկապես հեռավոր մարզերում
գյուղատնտեսության հետ չկապված ոլորտների եւ գյուղատնտեսության
ֆինանսավորումը համաչափ չլինի, ապա զարգացման որոշակի փուլում
գյուղատնտեսությունն այլեւս կկորցնի ներդրումներ կլանելու
կարողությունը` մարզերում վճարունակ պահանջարկի աճի բացակայության
պատճառով»,- նշեց Ա.Մուրադյանը: