ՄՈՍԿՎԱ, 2 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Այսօր Մոսկվայում 102
տարեկան հասակում վախճանվել է լեգենդար բալետմայստեր, ժողովրդական
պարի անսամբլի հիմնադիր եւ անփոփոխ գեղարվեստական ղեկավար Իգոր
Մոիսեեւը, հաղորդում է ԻՏԱՌ-ՏԱՍՍ-ը:
ԽՍՀՄ ժողովրդական արտիստ, Սոցիալիստական աշխատանքի հերոս,
Լենինյան եւ Պետական մրցանակների դափնեկիր Իգոր Մոիսեեւին
պարգեւների քանակով քչերը կարող են հավասարվել: Իսկ իր տաղանդով`
նա պարզապես եզակի է: Նա ապրեց երկարատեւ, իրադարձություններով
հարուստ կյանք եւ փայլուն ստեղծագործական ուղի անցավ:
Ռուսաստանի նախագահ Վլադիմիր Պուտինը ցավակցություն է հայտնել
Իգոր Մոսիեեւի հարազատներին եւ մերձավորներին:
Իգոր Մոիսեեւի հետ հրաժեշտը տեղի կունենա նոյեմբերի 6-ին
Չայկովսկու անվան համերգասրահում: Հոգեհանգիստը կկայանա նոյեմբերի
7-ին, իսկ հուղարկավորությունը` նույն օրը Նովոդեւիչիեի
գերեզմանատանը: