ԱՎԱՐՏՎԵԼ Է ՀՀՊ-Ի ՀԱՐՑՈՎ ՉԵԽԻԱՅԻ ԵՎ ԱՄՆ-Ի ԲԱՆԱԿՑՈՒԹՅՈՒՆՆԵՐԻ
ՀԵՐԹԱԿԱՆ ՓՈՒԼԸ
02-11-2007 17:32:00 | Չեխիա | Միջազգային
ՊՐԱՀԱ, 2 ՆՈՅԵՄԲԵՐԻ, ՆՈՅՅԱՆ ՏԱՊԱՆ: Պրահայում ավարտվել է
Չեխիայում ԱՄՆ-ի ՀՀՊ ռադիոտեղորոշման կայան տեղակայելու ծրագրերի
իրականացման մասին չեխ-ամերիկյան բանակցությունների հերթական
փուլը: Կողմերը նոյեմբերի 1-ի երեկոյան փաստել են, որ բավարարված
են բանակցությունների ընթացքից, եւ համոզմունք հայտնել, որ դրանք
կավարտվեն մինչեւ եկող տարվա սկիզբը:
«Մենք քննարկել ենք հարցեր, որոնք բացառապես կապված էին
չեխական տարածքում ռադարի ամերիկացի զինծառայողների թվից սպասարկող
անձնակազմի գտնվելու հետ: ՌՏԿ-ում Ռուսաստանի ներկայացուցիչների
ներկայության տարբերակներ երբեք չեն եղել եւ բանակցությունների
առարկա չեն լինի: Այդ հարցը պետք է լուծվի քաղաքական մակարդակում:
Առայժմ այն, ընդհանրապես, չկա օրակարգում, հաշվի առնելով ռուս
քաղաքական գործիչների վերջին հայտարարությունները այդ առիթով»,-
հայտարարել է չեխական պատվիրակության ղեկավար, Չեխիայի
պաշտպանության նախարարության ռազմավարական պաշտպանական
քաղաքականության վարչության պետ Իվան Դվորժակը:
ՀՀՊ առնչությամբ չեխ-ամերիկյան բանակցություններն սկսվել են
մարտին: Սպասվում է, որ եկող տարվա սկզբին չեխական խորհրդարանը
որոշում կընդունի ՌՏԿ-ի ստեղծման հնարավորության մասին: