ԵՐԵՎԱՆ, 30 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Նոյեմբերի 2-4-ին Երեւանում կանցկացվի «Ինչպե՞ս կազմակերպել հանգիստը Հայաստանում եւ արտերկրում» խորագիրը կրող զբոսաշրջության 7-րդ միջազգային ցուցահանդեսը, որի նպատակն է զարգացնել ներքին եւ տարածաշրջանային տուրիզմը: Այս մասին «ՆՈՅՅԱՆ ՏԱՊԱՆ»-ի թղթակցին հայտնեց ցուցահանդեսի կազմակերպիչ «ԱՍՏԱ» ճամփորդական գործակալների ամերիկյան միության հայաստանյան ներկայացուցչության նախագահ Եղիշե Թանաշյանը: Ըստ նրա, ցուցահանդեսին մասնակցելու են տուրիզմի ոլորտը ներկայացնող 45 կազմակերպություններ, այդ թվում Վրաստանից եւ Աջարիայից: Ե.Թանաշյանի խոսքերով, այս անգամ ցուցահանդեսին մասնակցելու են ոչ միայն Երեւանի, այլեւ մի շարք մարզերի` Արմավիրի, Գեղարքունիքի, Լոռիի, Կոտայքի, Շիրակի, Վայոց Ձորի, կազմակերպություններ: Նրանք ներկայացնելու են հյուրանոցներ, հանգստյան տներ, ավիաընկերություններ, սննդի օբյեկտներ, ապահովագրական կազմակերպություններ, տուրիզմի կրթական հաստատություններ, ինֆորմացիոն գործակալություններ եւ այլն: Նշվեց, որ հաջորդ տարի անցկացվելիք ցուցահանդեսին նախատեսվում է արտերկրից հրավիրել տուրիստական փաթեթների գնորդների:

---