ԻՍՐԱՅԵԼԻ ՎԱՐՉԱՊԵՏ ԷՀՈՒԴ ՕԼՄԵՐՏԻ ԴԵՄ ԵՐԿՈՒ ՆՈՐ ՔՐԵԱԿԱՆ ԳՈՐԾ
Է ՀԱՐՈՒՑՎԵԼ
15-10-2007 15:32:00 | Իսրայել | Միջազգային
ԹԵԼ ԱՎԻՎ, 15 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: Իսրայելի վարչապետ
Էհուդ Օլմերտի դեմ հարուցվել է եւս երկու քրեական գործ
իշխանությունը ի չարս գործադրելու կասկածանքով: Համապատասխան
կարգադրությունը արել է կառավարության իրավաբանական խորհրդական
(գլխավոր դատախազ) Մենի Մազուզը:
Հետաքննությունն սկսվել է պետական հսկիչ Միխա Լինդենշտրաուսի
նախաձեռնությամբ, որը ենթադրում է, որ Օլմերտը 2003-2005
թվականներին արդյունաբերության, առեւտրի եւ զբաղվածության նախարար
եղած ժամանակ առաջ է մղել փաստաբանական գրասենյակի իր նախկին
գործընկեր Ուրի Մեսերի շահերը: Մասնավորապես, պետական հսկիչի
գերատեսչությունը պարզել է, որ մի շարք գործարաններ ու
արդյունաբերական խմբեր, որոնց հետ կապված է Մեսերը, ստացել են
«ներդրումների արտոնյալ օբյեկտների» կարգավիճակ, իբր, ոչ առանց
Օլմերտի օգնության: Դրանից բացի, նրան կասկածում են մի շարք այսպես
կոչված քաղաքական նշանակումների մեջ իրեն ենթակա
նախարարությունում: