ԱՄՆ-Ն ԵՎ ՄԵԾ ԲՐԻՏԱՆԻԱՆ ԼԵՀԱՍՏԱՆԻ, ՎՐԱՍՏԱՆԻ ԵՎ ԲԱԼԹՅԱՆ
ԵՐԿՐՆԵՐԻ ՀԱՏՈՒԿ ԾԱՌԱՅՈՒԹՅՈՒՆՆԵՐԸ ՕԳՏԱԳՈՐԾՈՒՄ ԵՆ ՌՈՒՍԱՍՏԱՆԻ ԴԵՄ
10-10-2007 16:00:00 | Ռուսաստան | Միջազգային
ՄՈՍԿՎԱ, 10 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: ԱՄՆ-ն եւ Մեծ Բրիտանիան
Լեհաստանի, Վրաստանի եւ Բալթիայի երկրներն ակտիվորեն օգտագործում
են Ռուսաստանի դեմ աշխատանքի համար:
«ԿՀՎ-ն եւ Մեծ Բրիտանիայի հետախուզական ծառայությունը
շարունակում են ռուսական ուղղությամբ իրականացվող աշխատանքի մեջ
ներգրավել Լեհաստանի, Վրաստանի, Բալթիայի եւ որոշ այլ երկրների
իրենց գործընկերներին»,- «Արգումենտի ի ֆակտի» թերթին տված
հարցազրույցում հայտարարել է ՌԴ ԱԴԾ տնօրեն, բանակի գեներալ
Նիկոլայ Պատրուշեւը:
Ըստ նրա, ամերիկյան եւ բրիտանական հատուկ ծառայությունները
լուրջ ազդեցություն են գործում այդ պետությունների եւ Արեւելյան
Եվրոպայի որոշ այլ երկրների հատուկ մարմինների վրա: «Դա վերաբերում
է ամենալայն սպեկտրի` կադրային անձնակազմի ձեւավորումից եւ բյուջեի
բաշխումից մինչեւ գործունեության ռազմավարական ուղղությունների
ընտրությունն ու համատեղ հետախուզական միջոցառումների անմիջական
կազմակերպումը»,- պարզաբանել է ԱԴԾ ղեկավարը:
Պետրուշեւը նշել է, որ ՆԱՏՕ-ի անդամ պետությունների հատուկ
ծառայությունները նախկինի պես չափազանց ակտիվ են Ռուսաստանի
հանդեպ: Ընդ որում նա հատկապես առանձնացրել է Մեծ Բրիտանիային, որի
հատուկ մարմինները «ոչ միայն հետախուզություն են իրականացնում
բոլոր ուղղություններով, այլեւ ջանում են ներգործել մեր երկրի
ներքաղաքական իրավիճակի զարգացումների վրա»:
Ըստ նրա, իրենց գործողություններով աչքի են ընկնում նաեւ
թուրքական հատուկ ծառայությունները, որոնք ձգտում են դիրքեր գրավել
եւ զարգացնել մուսուլմանների հոծ բնակությամբ ռուսաստանյան մարզերի
քաղաքական վերնախավի եւ խոշոր բիզնեսի ներկայացուցիչների շրջանում:
Իր հերթին, պակիստանյան հետախուզությունը ձգտում է մուտք ունենալ
դեպի ռազմական եւ երկակի նշանակության տեխնոլոգիաներ, ինչպես նաեւ
տեղեկություններ հայթայթել մի շարք երկրների հետ Ռուսաստանի
ռազմատեխնիկական համագործակցության մասին: