«ՌՈՅԱԼ ԱՐՄԵՆԻԱՅԻ» ԲԱԺՆԵՏԵՐԸ ՎԵՐԱԴԱՐՁԵԼ ԵՎ ԿԱԼԱՆՎԵԼ Է,
ԴԱՏԱՔՆՆՈՒԹՅՈՒՆԸ ՀԵՏԱՁԳՎԵՑ ՄԻՆՉԵՎ ՀՈԿՏԵՄԲԵՐԻ 15-Ը
03-10-2007 19:30:00 | Հայաստան | Հասարակություն
ԵՐԵՎԱՆ, 3 ՀՈԿՏԵՄԲԵՐԻ, ՆՈՅՅԱՆ ՏԱՊԱՆ: «Ռոյալ Արմենիա»
ընկերության համասեփականատեր Գագիկ Հակոբյանը հոկտեմբերի 3-ին
վերադարձել է Երեւան, օդանավակայանից ոստիկանները նրան ուղեկցել են
Երեւանի Շենգավիթ համայնքի ոստիկանության բաժին, նա կալանավորվել է
եւ տեղափոխվել «Նուբարաշեն» քրեակատարողական հիմնարկ: Այդպիսով ի
կատար է ածվել Քրեական վերաքննիչ դատարանի օգոստոսի 29-ի որոշումը
նրա նկատմամբ խափանման միջոց կալանքը ընտրելու մասին: Այդ
որոշմամբ, բուժման նպատակով Իսպանիայում գտնվող Գ.Հակոբյանի
նկատմամբ հետախուզում էր հայտարարվել, իսկ նրա մասով գործը
կասեցվել էր մինչեւ նրա վերադարձը:
Ինչպես «ՆՈՅՅԱՆ ՏԱՊԱՆ»-ի թղթակցի հետ զրույցում հայտնեց
Գ.Հակոբյանի պաշտպան Աշոտ Սարգսյանը, հոկտեմբերի 3-ին ինքը
միջնորդություն է ներկայացրել Քրեական վերաքննիչ դատարան, խնդրելով
քննել Գ.Հակոբյանի խափանման միջոցը փոխելու հարցը, ինչպես նաեւ
գործը կասեցումից հանել եւ դատաքննությունը վերսկսել զույգ
ամբաստանյալների մասնակցությամբ: Հիշեցնենք, որ «Ռոյալ Արմենիա»
ընկերության փոխտնօրեն Արամ Ղազարյանի մասով գործը քննվում էր
Քրեական վերաքննիչ դատարանում` մեղադրողների եւ տուժողի` «Ֆեդերալ
Ինվեստմենտ գրուպ»-ի ներկայացուցիչ Վաչե Պետրոսյանի ներկայացուցչի
վերաքննիչ բողոքների հիման վրա: Նրանք բողոքարկում են Երեւանի
Կենտրոն եւ Նորք-Մարաշ համայնքների առաջին ատյանի դատարանի
արդարացման դատավճիռը, պահանջելով ամբաստանյալներին հանցավոր
ճանաչել մեղադրանքի ողջ ծավալով` հաշիվ-ապրանքագրերը կեղծելու,
հարկերի վճարումից չարամտորեն խուսափելու, մաքսանենգության,
հանցավոր ճանապարհով ստացված եկամուտները օրինականացնելու,
«Federal Investment Group» ընկերության գույքը խաբեությամբ
հափշտակելու մեղադրանքներում:
Ա.Ղազարյանի մասով դատական նիստը հոկտեմբերի 3-ին չկայացավ,
դատարանի հայտարարությամբ` մեղադրողների բացակայության պատճառով:
Մեղադրողները դատարան էին ներկայացել դատական նիստի ժամից 19 րոպե
ուշացումով, սակայն արդեն դատարանը նիստը հետաձգել էր
մինչեւ հոկտեմբերի 15-ը: