ՍԵՊՏԵՄԲԵՐԻ 29-30-ԻՆ ՀԱՅԱՍՏԱՆՈՒՄ ԿԱՆՑԿԱՑՎԵՆ «ԵՎՐՈՊԱԿԱՆ
ԺԱՌԱՆԳՈՒԹՅԱՆ ՕՐԵՐ»-Ը
27-09-2007 18:30:00 | Հայաստան | Մշակույթ
ԵՐԵՎԱՆ, 27 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Պաշտոնապես սեպտեմբերի
21-ին Բելգրադում մեկնարկած «Եվրոպական ժառանգության օրեր»-ին
Հայաստանը կմիանա սեպտեմբերի 29-ին Ճարտարապետության ազգային
թանգարան-ինստիտուտում կայանալիք միջացառմամբ: Եվրոպական
մշակութային այդ ձեռնարկը Հայաստանում կանցկացվի «Ձեռակերտ եւ
անձեռակերտ ժառանգություն» խորագրի ներքո:
Ինչպես սեպտեմբերի 27-ի ասուլիսում հայտնեց ՀՀ մշակույթի
փոխնախարար Գագիկ Գյուրջյանը, Եվրոմիության հովանու ներքո
1999թ.-ից ամեն տարի սեպտեմբերից մինչեւ նոյեմբեր անցկացվող
«Եվրոպական ժառանգության օրեր»-ը միավորում են Եվրոպական
մշակութային կոնվենցիայի անդամ 49 երկրների: Ըստ նրա, «Եվրոպա.
ընդհանուր ժառանգություն» կարգախոսի ներքո կազմակերպվող
միջոցառումները միլիոնավոր եվրոպացիների համար հանդիսանում են
տարբեր ազգերի պատմությունն ու մշակույթը ճանաչելու եւ գնահատելու
լավագույն միջոց:
Հայաստանում ԵԽ-ի գլխավոր քարտուղարի հատուկ ներկայացուցիչ
Բոյանա Ուրումովան նշեց, որ միջոցառման նպատակն է պահպանել
վտանգված կամ անհետացման եզրին գտնվող պատմամշակութային
ժառանգությունը, ինչպես նաեւ քարոզել հանդուրժողականություն
հարեւան երկրների եւ ժողովուրդների միջեւ:
Նշենք, որ սեպտեմբերի 29-30-ին Հայաստանում անցկացվող
«Եվրոպական ժառանգության օրեր»-ի շրջանակներում ՀՀ Մշակույթի եւ
Բնապահպանության նախարարությունների ենթակայությամբ գործող բոլոր
թանգարաններ ու արգելոց-թանգարաններ մուտքը կլինի անվճար: