ՆՅՈՒ ՅՈՐՔ, 26 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: «Թույլ տալ Իրանին միջուկային զենք ունենալ` նշանակում է թույլ տալ ողջ տարածաշրջանի ապակայունացում»,- ՄԱԿ-ի Գլխավոր վեհաժողովի ամբիոնից հայտարարել է Ֆրանսիայի նախագահ Նիկոլա Սարկոզին: Նա ընդգծել է, որ Թեհրանի շուրջ առաջացած ճգնաժամը կարելի է լուծել միայն «կոշտության եւ երկխոսության» հիման վրա: «Իրանն իրավունք ունի ունենալու ատոմային էներգիա խաղաղ նպատակներով: Բայց եթե մենք թույլ տանք Իրանին միջուկային զենքի տիրել, մենք անհանդուրժելի ռիսկի կենթարկենք տարածաշրջանի եւ ողջ աշխարհի կայունությունը: Ես ողջ Ֆրանսիայի անունից կարող եմ ասել, որ այդ ճգնաժամը կարող է հաղթահարվել միայն կոշտության եւ երկխոսության միասնության հիման վրա»,- հայտարարել է Ֆրանսիայի առաջնորդը:

---