ՊՌՈՇՅԱՆ ԳՅՈՒՂՈՒՄ ԲԱՑՎԵՑ ԱՐՑԱԽՅԱՆ ՊԱՏԵՐԱԶՄՈՒՄ ԶՈՀՎԱԾ
ԱԶԱՏԱՄԱՐՏԻԿՆԵՐԻ ՀՈՒՇԱՀԱՄԱԼԻՐԸ
24-09-2007 16:40:00 | Հայաստան | Հասարակություն
ԵՐԵՎԱՆ, 24 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Կանադահայ բարերարներ
Նիկոլ եւ Զաբել Աբրահամյանների ֆինանսական աջակցությամբ Կոտայքի
մարզի Պռոշյան գյուղում կառուցվել է արցախյան պատերազմում զոհված
պռոշյանցի ազատամարտիկների հուշահամալիրը: Հուշարձանը նախագծել է
ճարտարապետ Թելման Գեւորգյանը:
Ինչպես սեպտեմբերի 23-ին հուշահամալիրի բացման արարողության
ժամանակ նշեց ՀՀ Ազգային Ժողովի փոխնախագահ Վահան Հովհաննիսյանը,
սա մեկ անգամ եւս վկայում է, որ ժողովուրդը ոչ միայն չի մոռացել իր
հերոսներին, այլեւ ամեն ինչ անում է նրանց անունը սերունդների
հիշողության մեջ միշտ վառ պահելու համար: «Այս տղաները զոհվել են
ոչ թե իրենց գյուղի, այլ հայ ժողովրդի եւ պետության համար»,- նշեց
Վ.Հովհաննիսյանը` հավելելով, որ հայ ժողովուրդը այսօր էլ այնքան
մարտունակ է, որ ցանակացած պահի կարող է ոտքի կանգնել եւ պաշտապնել
հայրենիքի սահմանները:
Պռոշյանի գյուղապետ Հրաչ Մուրադյանի խոսքերով, մոտ 15 տարի
պռոշյանցիները սպասել են տարբեր պատճառներով ձգձգվող հուշարձանի
կառուցմանը: «Հետագա սերունդները գալով այս պանթեոն մեկ անգամ եւս
կգիտակցեն, թե ինչ գնով է ազատագրվել Արցախը: Մենք հպարտանում ենք
մեր հերոսներով, եւ փառք այն ժողովրդին, որը չի մոռանում իր
հերոսներին»,- ասաց նա:
Ի դեպ, Պռոշյան գյուղում բնակություն հաստատած կանադահայ
Աբրահամյանների ընտանիքը Հայաստանում իրականացնում է տարբեր
բարեգործական ծրագրեր: Նրանց աջակցությամբ Պռոշյանում կառուցվում է
մարզադպրոց, վերանորոգվում է գյուղի բուժկենտրոնը, շուտով կսկսվեն
նաեւ գյուղի մանկապարտեզի եւ դպրոցի վերանորոգման աշխատանքները: