ՖԼԱՆԴՐԻԱՅԻ ԽՈՐՀՐԴԱՐԱՆԸ ՄԵՐԺԵԼ Է ԲԵԼԳԻԱՅԻ ՄԱՍՆԱՏՄԱՆ ՄԱՍԻՆ
ՀԱՆՐԱՔՎԵ ԱՆՑԿԱՑՆԵԼՈՒ ԱՌԱՋԱՐԿՈՒԹՅՈՒՆԸ
11-09-2007 17:18:00 | Բելգիա | Միջազգային
ԲՐՅՈՒՍԵԼ, 11 ՍԵՊՏԵՄԲԵՐԻ, ՆՈՅՅԱՆ ՏԱՊԱՆ: Ֆլամանդական
ուլտրա-աջերը սեպտեմբերի 10-ին չեն կարողացել Ֆլանդրիայի
խորհրդարանում անցկացնել իրենց տարածաշրջանը Բելգիայից անջատելու
վերաբերյալ հանրաքվեի անցկացման մասին օրինագիծը:
Ըստ տեղական լրատվամիջոցների, Ֆլանդրիայի խորհրդարանի
լիագումար նստաշրջանում Բելգիայից անջատվելու մասին շտապ կարգով
հանրաքվե անցկացնելու «Վլաամս բելանգ» («Ֆլամանդական շահ»)
ազգայնական դաշինքի պահանջի օգտին քվեարկել է 127 պատգամավորներից
32-ը:
Իրենց պահանջը ազգայնականների առաջնորդ Ֆիլիպ Դեւինտերը
պատճառաբանել է ներկայիս քաղաքական ճգնաժամի անլուծելիությամբ, որի
հետեւանքով Բելգիան արդեն երեք ամիս է` չի կարողանում նոր
կառավարություն ձեւավորել: Ճգնաժամը պայմանավորված է սահմանադրական
բարեփոխումների խնդրին առնչվող վալլոնյան (ֆրանսալեզու) եւ
ֆլամանդական (նիդերլանդալեզու) կուսակցությունների միջեւ առկա սուր
հակասություններով:
Հասարակական կարծիքի հարցումների համաձայն, Բելգիայի բաժանման
գաղափարը պաշտպանում է ֆլամանդների 40 տոկոսը եւ վալլոնների 3
տոկոսից ոչ ավելին: